Maıqaıyń kentiniń Turǵyn-úı kommýnaldyq sharýashylyq, sý júıeleri, qubyrlar jaǵdaıy osy kúnge deıin bitpeıtin máselege aınalýda.
1997 jyldary sý, jylý bolmaı, kenttiń halqy jartylaı kóship te ketken-di. Qazir kentte 9 myńnan asa halyq turady. Birneshe óndiris oryndary ornalasqan. Biraq, sheshimin tappaı turǵan sharýalar áli de az emes.
Qubyrlardy jańadan tóseý jumystaryn júrgizý úshin Baıanaýyl aýdanynyń ákimdigi kentke oblystyq bıýdjetten qarajat bólinse dep otyr. Basqarma bolsa, ózderiń aýdandyq bıýdjet esebinen jóndeńder dep usynys bildirgen.
Sondyqtan, oblystyq ákimdik jıynynda oblys ákimi Bolat Baqaýov tozǵan qubyrlardy túgendep, ár shaqyrymynyń kimge tıesili ekenin anyqtaýdy tapsyrdy. Monopolısterdiń, senimdi basqarýǵa alǵan ınvestorlardyń mindettemelerin ýaqytynda oryndaýyn qadaǵalaý qajettigi de aıtyldy.
Al, kent ákimdiginiń málimetinshe, kenttegi jalpy uzyndyǵy 33,143 shaqyrym «Ekibastuz-Maıqaıyń» sý tartqyshy jáne kent ishilik uzyndyǵy 38 shaqyrym sý qubyry «Maıqaıyń altyn» AQ-qa senimgerlik basqarýǵa berilgen.
О́ńirde bıyl respýblıkalyq bıýdjet esebinen óńirdegi 4 jobany iske asyrý úshin 3,3 mlrd. teńge qarastyryldy. Oblystyq bıýdjetten bólingen 120 mıllıon teńgege Aqsý qalasynyń magıstraldi qubyrlarynyń qurylysy júrgizildi.
Al ,«Nurly jol» baǵdarlamasy boıynsha óńirde bıyl 5 joba qolǵa alyndy. Biraq, Aqsý qalasyndaǵy negizgi ortalyq sý berýshi stansanyń qaıta qalpyna keltirý jumystary sylbyr júrgizlýde.
Oblystyq energetıka jáne turǵyn úı-kommýnaldyq sharýashylyǵy basqarmasynyń málimetinshe, óńirdegi oblys ortalyǵy, Ekibastuz ben Aqsý qalalarynda 1251 shaqyrym sý qubyrlary jelisi jáne 889 shaqyrym sýdy burý qubyrlary bar. Tozǵan qubyrlar jartylaı jóndelýde.
2015-2018 jyldary úsh qalada quny 5,6 mlrd. teńge turatyn 15 jobasy júzege asqan. Joba barysynda Ekibastuz, Aqsý qalalarynda uzyndyǵy 28,3 shaqyrymdyq sý qubyrynyń qurylysy júrgizilse, oblys ortalyǵynda sý tazartý qubyrlary jańartylypty.
Farıda BYQAI,
«Egemen Qazaqstan»
Pavlodar oblysy
