Bul qosymshanyń ereksheligi, jumyssyz júrgen jandar bos jumys oryndary men ártúrli qyzmetter jóninde tegin aqparat alyp, ózderi týraly málimetterdi de osynda ornalastyra alady. Qarapaıym turǵyndar da qosymshany paıdalanyp, ózderine qajetti mamandardy (santehnık, elektrık, sylaqshy, taǵy basqa) tabýyna múmkindik bar.
«Bul qosymsha jumyssyz júrgen kisilerge de, qarapaıym turǵyndarǵa da paıdaly. Máselen, siz santehnık nemese elektrık bolsańyz, úıden shyqpaı-aq qosymshaǵa ózińiz týraly málimetterdi engizip qoıýyńyzǵa bolady. Elimizdiń kez kelgen turǵyny ózi turatyn qaladan (aýdan, aýyldan) santehnık nemese elektrık izdese, osynda kirip, atalǵan mamandardy tańdaı alady. О́zine qolaıly baǵany qoıady. Mobıldi qosymsha «Bos jumys oryndary», «Kómek», «Qyzmet kórsetý» sekildi bólimderden turady. Qosymshany barlyq qazaqstandyqtar Play Market, App Store baǵdarlamalary arqyly kóshirip, tegin qoldana alady. Erekshe aıtqym keletini, «Kómek» bólimi arqyly úıińizdegi artyq zattar týraly aqparatty qosymshaǵa ornalastyryp, muqtaj jandarǵa da járdemdese alasyz», - deıdi qosymsha avtory.
Qala, aýdan, aýyl turǵyndarynyń paıdalanýyna qolaıly baǵdarlamany jasap shyǵý úshin avtor bir jyldaı ter tógipti. Tegin qosymshaǵa 40 shaqty bos oryn men 100-ge tarta qyzmet túrleri engizilgen. О́nertapqysh qosymsha Qazaqstan boıynsha jumysyn bastaǵanyn, elimizde IT mamandardyń azdyǵynan ázirge tili oryssha bolǵanymen, bir-eki aı kóleminde qazaqsha nusqasy iske qosylatynyn jetkizdi. Qarapaıym turǵyndarǵa qajetti isti qolǵa alǵan kásipker jigit Eńbek jáne áleýmettik qorǵaý mınıstrligi, oblystyq jumyspen qamtý jáne áleýmettik baǵdarlamalardy úılestirý basqarmalary tarapynan qoldaý bolsa, birlese jumys isteýge daıyn ekendigin aıtady.
Azamat QASYM,
«Egemen Qazaqstan»
Shyǵys Qazaqstan oblysy
