Aqtóbe oblysynda bógde adamnyń kómegine zárý jáne erekshe kóńil bólýdi qajet etetin 42 zeınetker bar. Aıta keterligi, olardyń barlyǵy jasotandyqtardyń - belsendi ómirlik ustanymy bar, keń peıildi jas turǵyndardyń turaqty qamqorlyǵynda.
Búgin balalar Samal Selbaeva, Zoıa Boıko jáne Anastasııa Prıhnoǵa azyq-túlik qoryn ákeldi jáne úzdiksiz jaýǵan qardan aýlasyn tazartty.
Samal Selbaeva endi 70 jasqa tolady. Ol 40 jyl medısına salasynda eńbek etken. Qazir jalǵyz, 3 balasy basqa qalalarda turady jáne jumys jasaıdy. Sondyqtan ol bógde adamnyń kómegine muqtaj.
- Úıim yldıda ornalasqan. Erigen qar sýy jınalmas úshin aýlanyń ishin qardan jıi tazartyp turý qajet. Bul jumysqa únemi jasotandyqtar kómek kórsetip keledi. Meni eshqashan umytpaıdy. Al Toqtar maǵan ózimniń balamdaı bolyp ketti, - dedi ol.
Zoıa Danılovna da bilim salasynda 40 jyl jumys istegen. Ol qalanyń eski bóliginde jalǵyz turady. Jasotandyqtar onyń úıine de jıi barady. Apta saıyn júgirip kelip, úıin jınaýǵa kómektesedi, azyq-túlik ákelip beredi. Jumystan keıin mindetti túrde úı ıesimen shaı ishýdi umytpaıdy. Árıne, másele sháı ishýde emes, sháı ishý dástúrinde, ıaǵnı qarııalarmen shúıirkelesip, kóńil aýdarý bárinen de mańyzdy.
- Ata-anam bizdi ádepti, úlkendi syılap, kishige úlgi bolýǵa tárbıelep keledi. Meniń de 70-ten asqan ata-ájem bar. Sondyqtan qarııalarǵa kómek kórsetý týraly usynys jasaǵanda birden kelisip, dostarymyzben birge eriktiler tobyn qurdyq. Biz qamqorlyǵymyzdaǵy ata-ájelerimizge aýa-raıy men jumysymyzǵa qaramastan apta saıyn baramyz. Barmaı qalý olarǵa aýyr tıedi, al bul durys emes. Aǵa býynǵa qamqorlyq jasaý – parasatty paryzymyz, - dedi «Jas Otan» jastar qanatynyń belsendisi Medet Ábenov.
