Sharaına
Senbi, 22 jeltoqsan 2012 7:11
Daý qaıta órshýi múmkin
Japonııanyń teńiz jaǵalaýy kúzeti daýly araldar Senkaký mańynan Qytaıdyń úsh barlaý kemesin baıqaǵan. «Frans-press» aqparat agenttiginiń jazýynsha, daýly aýmaqtan qytaı kemeleriniń kórinýi Japonııada ótken parlamenttik saılaýdan keıin bolǵan alǵashqy jaǵdaı.
Senbi, 22 jeltoqsan 2012 7:11
Daý qaıta órshýi múmkin
Japonııanyń teńiz jaǵalaýy kúzeti daýly araldar Senkaký mańynan Qytaıdyń úsh barlaý kemesin baıqaǵan. «Frans-press» aqparat agenttiginiń jazýynsha, daýly aýmaqtan qytaı kemeleriniń kórinýi Japonııada ótken parlamenttik saılaýdan keıin bolǵan alǵashqy jaǵdaı.
Kemeler Senkaký arhıpelagyna kiretin Kýbadzıma aralynyń soltústik-batysynda jergilikti ýaqyt boıynsha saǵat 10.20-da baıqalǵan. Bul áreketterge jaýap retinde Tokıo osy aımaqqa segiz ıstrebıtel men taǵy bir áskerı ushaq jiberipti. Aıta keteıik, 1970 jyldan beri jalǵasyp kele jatqan Senkaký araldaryna qatysty eki memleket arasyndaǵy daý, onda kómirsýtegi tabylǵannan keıin qaıta órshigen edi.
El tarıhynda tuńǵysh ret
Ońtústik Koreıada ótken prezıdenttik saılaýda «Senýrı» konservatıvtik bıleýshi partııasynyń ókili Pak Kyn He jeńiske jetti.
Osy eldiń saılaý komıssııasy taratqan málimetter boıynsha, asa tartysty ótken prezıdenttik saılaýda Pak Kyn He óziniń negizgi básekelesi Mýn Chje Indi artta qaldyryp, saılaýshylardyń 51 paıyzdan astam daýysyna ıe boldy. El tarıhynda tuńǵysh ret prezıdenttikke áıel adamnyń saılanýy onyń enshisine tıip otyr. Endi ol 2013 jyldyń aqpanynda ókilettigi aıaqtalatyn Lı Men Bakty aýystyrady. Pak Kyn He general Pak Chon Hıdiń qyzy. Ákesi kezinde Ońtústik Koreıadaǵy eń kórnekti tulǵalardyń biri bolǵan. 1963-1979 jyldar aralyǵynda prezıdent taǵyna da otyrǵan.
Áskerıler jiberýdi maquldady
BUU-nyń Qaýipsizdik Keńesi Malı eliniń qaýipsizdigin qorǵaý maqsatynda osy memleketke halyqaralyq áskerı kontıngent jiberý máselesin maquldady. Uıym saıtyndaǵy aqparatqa qaraǵanda, Qaýipsizdik Keńesine múshe 15 eldiń barlyǵy jaqtap daýys bergen.
Halyqaralyq áskerı mıssııaǵa el úkimetiniń soltústik aımaqtardaǵy terrorshylarmen, ekstremıstermen jáne qarýly toptarmen kúresine kómek kórsetý úshin «qajetti barlyq sharalardy» qoldanýǵa da ruqsat etipti. Osyǵan baılanysty qararda júzege asyrylatyn operasııalar halyqaralyq gýmanıtarlyq quqyq normalaryn jáne adam quqyqtaryn buzbaý jaǵy atap kórsetilgen. Mıssııaǵa bastapqy mandat bir jyl merzimge berilgen. «Frans-press» agenttiginiń aqparaty boıynsha, kontıngenttiń mindeti – eldiń qarýly kúshterin daıyndaý, áskerı operasııalarǵa qoldaý kórsetý, sondaı-aq turǵyndardyń qaýipsizdigin qorǵaý jáne bosqyndardy óz eline qaıtarý.
Serdıýkovtyń da aty ataldy
Reseı Qorǵanys mınıstrligine qaraıtyn «Oboronservıs» isi boıynsha qamaýda otyrǵan Dmıtrıı Mıtıaev tergeýshilerge bergen jaýaptarynda burynǵy mınıstr Anatolıı Serdıýkovtyń vedomstvonyń múlikterine qatysty jasaǵan aıla-sharǵysy týraly aıtyp berdi. Bul jóninde keshe «Izvestııa» gazeti jazdy.
Jýrnalısterge belgili bolǵanyndaı, D.Mıtıaevtiń aıtýynsha, Serdıýkovtyń jeke ózi «Oboronservıs» dırektorlar keńesiniń múshelerine, ásirese, E.Smetanovaǵa mınıstrliktiń múlikterin satý máseleleri boıynsha qalaı daýys berý qajet ekendigi jóninde tapsyrma bergen kórinedi. Biraq bul tergeýshilerdi qyzyqtyra qoımaǵan. Al Mıtıaevtiń advokaty tarap ketken aqparat týraly aıtyp berýden bas tartqan. Ol tek Mıtıaevtiń isi «Oboronservıstiń» negizgi isterinen bólek qaralyp jatqanynan, Mıtıaevtiń isin Tergeý komıtetiniń ásker basqarmasy emes, IIM-niń tergeý departamenti tergegeninen habardar etken.
«Magnıtskıı zańyna» qarsy jaýap
AQSh-tyń memlekettik departamenti Reseıdiń «Magnıtskıı zańyna» jaýap retinde qabyldaǵan aldaǵy ýaqytta amerıkalyqtardyń reseılik balalardy asyrap alýǵa tyıym salý týraly qujatyna alańdaýshylyq bildirdi.
Memlekettik departament ókiliniń málimdemesinde: «Biz zańnyń sońǵy nusqasyn kútip otyrmyz, ózimizdiń kózqarasymyzdy jetkizý maqsatynda reseılik resmı tulǵalarmen baılanysatyn bolamyz», delingen. Sonymen birge, ókil halyqaralyq asyrap alýdyń arqasynda jyl saıyn «myńdaǵan bala ata-analy bolatynyn», al amerıkalyq otbasylardyń ómiri jaqsy ekenin de atap ótipti. Bul qujatta AQSh azamattarynyń reseılik balalardy asyrap alýǵa tyıym salý ǵana emes, AQSh tarapynan qarjylandyrylyp, saıasatpen aınalysatyn qurylymdardyń qyzmetin toqtatý sharalary da qarastyrylǵan.
Qujat materıaldary jarııa etiledi
Lıvııa úkimeti 270 adamdy ajal qushtyrǵan Shotlandııanyń Lokerbı qalasyndaǵy terrorlyq áreketke qatysty qujatty jarııa etpek. Qujat endi bir jyldan soń daıyn bolatyn sııaqty. Bul keshe, ıaǵnı terrorlyq árekettiń 24 jyldyǵyna baılanysty habarlandy.
Atalǵan qujattyń jarııa etilýiniń bir jylǵa jýyq keshiktirilýin Lıvııanyń Ulybrıtanııadaǵy elshisi Mahmud Nakýa bılikke kelgen Lıvııa úkimetiniń eń aldymen eldegi turaqtylyq pen qaýipsizdikti qamtamasyz etýge qol jetkizý qajettigimen baılanystyrdy. Onyń ústine eki el arasynda qujatty jarııa etýge qatysty qazirshe eshqandaı kelisim jasalǵan joq. Terrorlyq áreket 1988 jyly 21 jeltoqsanda jasalǵan edi. Terrorshylar «Boıng-747» ushaǵyn Londonnan Nıý-Iorkke ushyp shyqqanda jaryp jibergen bolatyn.
Internet materıaldary negizinde ázirlendi.
