Balalarǵa Konstıtýsııa, Otan týraly túsinik qalyptastyrýdy kózdeıtin tanymdyq tárbıe saǵatyna balaqaılar jan-jaqty daıyndalyp kelipti. Oqý-tárbıe prosesi birneshe bólimnen turdy. «Sen bilesiń be?» dep atalatyn alǵashqy kezeńde muǵalim balalardan alda qandaı mereke toılanatynyn surady. Al balaqaılar birinen soń biri «30 tamyz – Konstıtýsııa kúni dep atalady», «Alǵashqy qońyraý soǵylatyn 1 qyrkúıek – Bilim kúni kele jatyr», degen jaýaptaryn aıtty. Osydan keıin pedagog oqýshylarǵa Ata Zańnyń ózderindeı adam quqyqtaryn qorǵaıtyn talaptar jazylǵan basty qujat ekenin túsindirdi. Sabaq barysynda balalarǵa Otan jóninde de tanymdyq aqparat berilip, kezeń qorytyndysynda baldyrǵandar Otan týraly «Ol – bizdiń jerimiz, týymyz, úıimiz, dostarymyz» degen oılaryn jetkizip, sabaqtyń taqyrybyna saı jattaǵan óleń shýmaqtaryn oqydy. Ekinshi kezeńde muǵalim balalardy Ata Zańymyzda jazylǵan quqyǵymyzdyń biri retinde tegin bilim alýdy atap ótip, mektep, oqý men ilim jınaýǵa shaqyryp, jalqaýlyqtan jerinýge úıretti. Kelesi kezeńde Qazaqstannyń memlekettik rámizderine baılanysty negizgi ári basty túsinikter bala tiline saı túsindirildi.
Tárbıe saǵatynyń sońynda Elbasy kitaphanasy dırektorynyń orynbasary Botagóz Qaıypova ujymynyń atynan barsha qazaqstandyqty Konstıtýsııa kúnimen jáne barlyq bilim salasynyń qyzmetkerlerin, sondaı-aq bilim alýshylardy aldaǵy merekemen quttyqtady ári ashyq sabaqqa qatysqan oqýshylarǵa mazmundy kitaptar men mektepke qajetti qural-jabdyqtardy tabystady.
Ashyq tárbıe saǵaty bolǵandyqtan, sharaǵa ata-analar da jınalǵan bolatyn. Balalarynyń alǵashqy qadamyna qoldaý bildirip kelgen kópshiliktiń atynan kóp jasaǵan áje Asylkúl Birimqulqyzy sóz alyp: «Bıyl meniń shóberemmen qatar balalar birinshi synypqa barǵaly otyr. Bilim kúni qarsańynda olarǵa ashyq sabaq ótkizip, daıyndyq júrgizgen mamandarǵa alǵys aıtamyn. Aınalaıyn, bóbekterim, alǵashqy qadamdaryń qutty bolsyn! Senderge tárbıe men bilim berip otyrǵan ata-analaryń, ustazdaryń aman bolsyn! Olardy qýantyp, keleshekte eldiń maqtanyshy bolýdy qalasańdar, sabaqty zeıinmen oqyp, bilim ozaty bolyńdar!», dep batasyn berdi.
