Arystyq balalar – Moldova jerinde

Qazaqstandyq jasóspirimderdiń dúnıetanymyn keńeıtip, rýhanı ba­­ıy­týǵa yqpal etetin sharany oqý jylynyń basynda ótkizý bastamasyn Nur Otan partııasynyń Syrtqy ister mınıstrligindegi bastaýysh partııa uıymynyń úılestirýimen Qazaq­stannyń Kıshınev qalasyndaǵy Bas konsýldyǵy usynǵan.

Bastamashylardyń qaıyrymdy­lyq aksııasyna «KMG International» kompanııasynyń bólimsheleri: «Rompetrol Moldova», «KAZROM FLOUR» JShS, «Cricova-vin» jáne «SupremaLex» kompanııalary demeý­shilik kórsetti.

Sapar basynda balalar jańa pisken jemister men kókónisterge baı ulttyq taǵamdardan dám tatyp, dastarqan basynda alǵashqy áserlerimen bólisti. Bolashaqta estrada juldyzy bolýdy armandaıtyn Oralbek Júsipov bul sapary týraly bylaısha áńgimeledi: «Bizge Moldovaǵa shaqyrylǵanymyz týraly habar kútpegen jerden keldi. Estigen kúnnen bastap biz ushaqqa otyrýdy asyǵa kúttik. Biz áýejaıdan shyqqan kezde aýa-raıy tamasha bol­dy. Maǵan Moldovanyń ulttyq mý­zy­kasy óte unady. Men onymen bola­shaqta jaqynyraq tanysamyn degen úmittemin, múmkin bir ánin úırenip alarmyn».

Áńgime barysynda balalar ózderi­niń ómirleri men bolashaqqa josparlary týraly yqylaspen aıtty. Olar eresek ómirge optımıstik kózqaraspen qarap, tańdaǵan mamandyqtary bo­ıynsha joǵary maman bolýdy armandaıdy. Mysaly, Tolǵanaı Masalıeva matematıka pániniń muǵalimi bolý­dy josparlaǵan, al Beksultan Álibek Qazaqstan Ulttyq qaýipsizdik komıteti qyzmetkeriniń jolyn tańdaǵan.

Hırýrg bolýdy armandaǵan Karına Sýlaımanova shetelge alǵashqy sapary jaıly, este qalǵan sátteri týraly baıandap berdi. «Moldova bizge óte unady – klımaty sondaı jyly, aýa da taza. Kıshınevtiń ózi óte jasyl jáne ádemi qala eken. Biz osy eldiń tarıhy tý­raly múmkindiginshe kóp bilgimiz ke­ledi, olarǵa bizdiń Qazaqstan týraly aıtyp bergimiz keledi», – deıdi Karına.

«Búldirshinderimizdiń baqytty, shabyttanǵan júzderin kórý men úshin úlken qýanysh. Bul sapar bizdiń oqýshylarymyzdyń ǵana emes, sonymen birge osy jazda úlken sy­naqty bas­tan keshken Arys qala­synyń barlyq turǵyndarynyń júre­gine jol tabatynyna senim­dimin. Bizdi qoldaǵan barlyq qazaqstandyqtarǵa alǵysymyz sheksiz. Moldovaǵa balalarǵa arnalǵan týr uıymdastyrýǵa kómektesken Qa­zaqstannyń Bas konsýldyǵyna, Syrt­­qy ister mınıstrligine jáne­ Nur Otan partııasyna erekshe alǵys bildirgim keledi», – deıdi bala­lar úıi­niń dırektory Merýert Súıin­dikova.

Saıahat barysynda arystyq jet­kinshekter Moldova murajaı­laryn, mádenı jáne tarıhı ortalyqtaryn, Eýro-2020 irikteý kezeńinde oınaıtyn Moldova-Túrkııa fýtbol matchyn kórýdi jáne Qara teńizge barýdy josparlap otyr. О́tken dúısenbide balalar Moldovanyń ońtústigindegi Gagaýzııa avtonomııalyq-terrıto­rıaldyq bóliginiń astanasy Komrat­taǵy Elbasy Nursultan Nazarbaevtyń músini ornalasqan Dańq alleıasyna bardy jáne onyń aýmaǵyndaǵy ózge de belgili nysandarda boldy.