Uıymnyń AQSh-taǵy ókili Djarbas Barbosanyń aıtynsha, vaksına dúıim jurtqa qoljetimdi bolý úshin zertteýdiń barlyq kezeńderinen sátti ótýi kerek.
"Reseıde COVID-19 dertine qarsy vaksına shyqty degen jańalyq bar. Preparat klınıkalyq synaqtyń 3 kezeńinen de sátti ótýi tıis. Keıin ódirýshi dárini lısenzııalaý kerek. Qazir Dúnıejúzilik densaýlyq saqtaý uıymy jańa vaksına jaıynda tolyq málimet alý úshin Reseı mamandarymen tyǵyz baılanysta. Tártip boıynsha bul dári Dúnıejúzilik densaýlyq saqtaý uıymynyń da tekserisinen ótýi qajet", dedi DDSU ókili Djarbas Barbos.
Aıta keteıik, kúni keshe Reseı prezıdenti Vladımır Pýtın úkimet múshelerimen ótken kezdesýde Reseıde koronavırýsqa qarsy álemdegi alǵashqy vaksınanyń tirkelgenin jarııalady. Sonymen qatar, dozany jappaı shyǵarý jýyq arada bastalatynyn da aıtty.
