Atalǵan qujat Elbasynyń ıdeıalary men bastamalaryn ilgeriletýdi, birlesken mádenı-bilim berý, ǵylymı-izdenis jobalardy iske asyrýdy kózdeıdi. Memorandým aıaǵyndaǵy negizgi seriktestik zertteý baǵdarlamalaryn, ǵylymı-praktıkalyq is-sharalardy (konferensııa, forým, semınar, taǵy basqa) uıymdastyrýǵa, aqparat almasýǵa negizdelgen eken.
Qol qoıylǵan qujattyń mańyzy jaıly Elbasy kitaphanasynyń basshysy Á.Rahymjanov: «Yntymaqtastyq memorandýmy Tuńǵysh Prezıdenttiń jahandyq ıdeıalary men ishki jáne syrtqy saıasat bastamalaryna aqparattyq-ımıdjdik qoldaý kórsetýge, Qazaqstannyń damýyna, jalpy álemdik qaýipsizdik júıesin qalyptastyrýǵa qosqan Elbasynyń úlesin jan-jaqty zertteýge baǵyttalǵan» dese, kelesi kezekte óz oıyn bildirgen Bilim jáne ǵylym mınıstri Ashat Aımaǵambetov: «Elbasy kitaphanasy mýzeıiniń jańa ǵımaratynda elimizdiń tarıhy tunyp tur. Elbasynyń «Rýhanı jańǵyrý» baǵdarlamasy aıasynda balalar sońǵy tehnologııalarmen jabdyqtalǵan mekemede qundy aqparatpen bilimin tereńdete túseri anyq. Bul baǵytta úlken jumys atqaryldy. Jaýapty is jalǵasyn taba bermek. Mýzeıge mektep, kolledj, joǵary oqý oryndarynyń bilim alýshylary keletin bolady. Dóńgelek ústel, sımpozıým, konferensııa sııaqty sharalar ótkiziledi. Josparlanǵan jumys aýqymy úmitti aqtaıtynyna senemin», degen pikirin jetkizdi.
Is-shara barysynda «Qazaqstan Respýblıkasynyń Tuńǵysh Prezıdenti – Elbasy N.Á.Nazarbaevtyń álemniń jetekshi ýnıversıtetterinde oqyǵan dáristeri» kitabynyń basylymdyq jáne elektrondy nusqalarynyń tusaýy kesildi. Jobanyń bas redaktory – Qazaqstan Respýblıkasy Tuńǵysh Prezıdenti – Elbasy keńsesiniń basshysy, saıası ǵylymdardyń doktory, professor Mahmut Qasymbekov.
Qatysýshylardyń nazaryna kitaptyń mazmunyn, maqsat-mindetin tanystyratyn beınerolık usynylyp, shara aıasynda álemniń jetekshi ýnıversıtetterinde Elbasynyń sóz sóılegen sátteri kórsetildi.
