Sharaǵa QR IIDM Avtomobıl joldary komıtetiniń tóraǵasy Saıranbek Barmaqov, «Jol aktıvteriniń ulttyq sapa ortalyǵy» RMK bas dırektory Zamır Saǵynov, «QazjolǴZI» AQ prezıdenti Baǵdat Teltaev, «QazAvtoJol» UK» AQ basqarma tóraǵasy Ulan Álipov, «Qazaqstannyń avtojolshylar qaýymdastyǵy» ZTB prezıdenti Baǵlan Baımaǵambetov jáne respýblıkalyq buqaralyq aqparat quraldarynyń ókilderi qatysty.
«Qazaqstanda alǵash ret avtojol salasyna arnalǵan ınternet-arna ashylyp otyr. Bul mańyzdy oqıǵa. Búgingi sharaǵa sala ókilderi, jýrnalıster qatysyp otyr. Biz árqashanda dıalog úshin, konstrýktıvti eskertýler úshin ashyqpyz. Sebebi memlekettik organdar, jol kompanııalary, BAQ pen barsha qazaqstandyqtardyń birlesken kúshiniń arqasynda ǵana jumysty jaqsartyp, Memleket basshysy aldymyzǵa júktegen mindetterdi oryndaı alamyz. Al «JOL KZ» arnasy atalǵan maqsat úshin úlken aqparattyq alań bolmaq», dedi Avtomobıl joldary komıtetiniń tóraǵasy Saıranbek Barmaqov.
Budan bólek biryńǵaı aqparattyq platforma damýyn Prezıdent Qasym-Jomart Toqaev atap ótken «estýshi memleket» tujyrymdamasyn nyǵaıtýǵa yqpal etetindigi, sondaı-aq qoıylǵan mindetterdi sheshý alańyna aınalatyndyǵy basa aıtyldy.
Osylaısha, «JOL KZ» kanalynda qurylys, rekonstrýksııalaý men jol jóndeý máseleleri kóteriledi dep kózdelgen. Sonymen birge, atqarylǵan jumystardyń sapasy, jańa tehnologııalar, jol qozǵalysynyń qaýipsizdigi basty nazarda bolady.
