Endi úshinshi toqsannan bastap osy yqsham aýdanda turatyn oqýshylardyń birazy jańa №78 mektep-gımnazııanyń kezekshi synyptarynda oqýǵa ázirlenip jatyr.
Oblys ákimi Ońdasyn Orazalın mektep-gımnazııanyń ashylý saltanatynda turǵyndardy kópten kútken qýanyshtarymen quttyqtaı otyryp, 900 oryndyq jańa ǵımarat «Nur-Aqtóbe» shaǵyn aýdanyndaǵy úsh aýysymdy oqý máselesin sheshetinine senim bildirdi.
О́ıtkeni jańa yqsham aýdanda turǵyn úılerdiń kóptep salynyp, jas otbasylardyń baspanaly bolýymen osy aýmaqtaǵy eki mektepte bala sany kúrt kóbeıip, oqýshylar úsh aýysymda oqýǵa májbúr bolǵan edi.
Qazirgi kezde qashyqtan oqytýǵa baılanysty oqýshylardyń basym bóligi úılerinde oqyp jatyr. Sol sebepten de mektepter jyldaǵydaı bala sany syımaı, oqý synyptary jetpeı jatqan jaǵdaıdy bastan keshirip otyrǵan joq.
Aldaǵy ýaqytta karantın aıaqtalyp, oqýshylar mektepke qaraı aǵylsa, osy kúrdeli másele taǵy da aldan shyǵady. Atshaptyrym sport zaly, kitaphana, ashana, zamanaýı oqý zaldarymen jabdyqtalǵan eki qabatty jańa mektep-gımnazııa oqýshylardyń sapaly bilim alýy úshin jasalǵan jaqsy múmkindik ekenin ata-analar da maquldap otyr.
О́ńir basshysy eki qabatty eńseli ǵımarat qurylysyn bıylǵy pandemııanyń qıyndyqtaryna qaramastan ýaqtyly ári sapaly tapsyrǵany úshin «Interstıl» JShS-niń basshylyǵyna alǵysyn jetkizdi.
