«Atyraý oblysynyń ákimi Mahambet Dosmuhambetovtiń tapsyrmasyna sáıkes, apatty úı turǵyndaryna 50 páter satyp alý úshin memlekettik satyp alý konkýrsy qaıta jarııalanatyn boldy. Máselemen ári qaraı Jylyoı aýdany ákimdigi tikeleı aınalysady», dep atap ótti aımaq basshysynyń orynbasary Baqytgúl Hamenova.
Búgin Jylyoı aýdany, Qulsary qalasynan bir top azamattary osy máseleni kótergen bolatyn. Olar Jylyoı aýdany, Qulsary qalasynyń №27 apatty úıiniń turǵyndary. 1988 jyly salynǵan bes qabatty №27 úı 2018 jyly apatty jaǵdaıda dep tanylǵan.
Al turǵyndardyń shaǵymdanýyna Jylyoı aýdandyq ákimdigine Sybaılas jemqorlyqqa qarsy kúres agenttiginiń Atyraý oblysy boıynsha departamentiniń haty sebepker bolǵan. Hatta Jylyoı aýdandyq ákimdigi apatty úı turǵyndary úshin satyp alýdy josparlap otyrǵan úılerdiń baǵasy orta eseppen 500-600 myń teńgege qymbat ekendigi jazylǵan. Sol sebepti, aýdandyq ákimdikke joǵary baǵada úı satyp alý prosedýrasyn toqtatý usynylǵan bolatyn.
Atyraý oblysy ákimdigi, Jylyoı aýdandyq ákimdigi jáne Sybaılas jemqorlyqqa qarsy kúres agenttiginiń Atyraý oblysy boıynsha departamenti jáne turǵyndarmen arada ótken jıyn nátıjesimen turǵyn úıler satyp alý týraly konkýrs naryqtaǵy baǵaǵa saı qaıta jarııalanatyn boldy.
