Ákim barlyq saladaǵy jetistikterge aıryqsha toqtalyp, ótken jyly oblys koronavırýs indetiniń saldaryna qaramastan ekonomıkanyń negizgi salalarynda ósimge qol jetkizgenin atap ótti. «Biz barlyq qıyndyqtardy birge eńserip kelemiz. Memleket basshysynyń qoldaýynyń jáne jerlesterimizdiń qajyrly eńbeginiń arqasynda ekonomıka 102,2 paıyzǵa ósti. О́nerkásiptegi óndiris kólemi 2019 jylǵy deńgeımen salystyrǵanda 3,1 paıyzǵa, aýyl sharýashylyǵynyń jalpy ónimi 5,1 paıyzǵa artty. Al, turǵyn úı qurylysynyń kólemi 28,2 paıyzǵa ósip, 344,1 mıllıard teńge ınvestısııa tartyldy», dedi Berdibek Saparbaev.
Sonymen qatar, óńirdegi ónerkásip kásiporyndarymen 505 mıllıard teńgeniń ónimi óndirilgen. Inflıasııa deńgeıi 7,3 paıyzdy quraǵan. Aǵymdaǵy jyly bul kórsetkishti 4-6 paıyz aralyǵyna tómendetý úshin áleýmettik mańyzy bar azyq-túlik taýarlarynyń baǵasyn turaqtandyrý boıynsha birqatar sharalar qabyldanýda. Bul mindetke qol jetkizý maqsatynda naqty is-qımyl jospary qurylǵan. Sondaı-aq, Berdibek Saparbaev «Alqaptan sórege deıin» jobasy aıasynda jumystardyń kúsheıetinin, áleýmettik pavılondar jelisin keńeıtip, aýylsharýashylyq jármeńkelerin ótkizýdi jalǵastyratynyn jetkizdi. О́tken jyly jumys oryndaryn saqtaýǵa, óndiris kólemin ulǵaıtýǵa jáne jumysshylar aldyndaǵy áleýmettik mindettemelerdi oryndaýǵa aıryqsha kóńil bólingen. Jambyldyq 4508 kásiporyn basshylyǵymen tıisti memorandýmdarǵa qol qoıylyp, nátıjesinde 41 jeke kásiporyndaǵy 19,4 myń jumysshynyń ortasha jalaqysy 26 paıyzǵa kóterilgen. «Álbette, biz munymen toqtap qalmaımyz. Ári qaraı da úılesimdi jumys istep, jańa belesterdi baǵyndyratyn bolamyz», dedi Berdibek Saparbaev.
Jambyl oblysy
