Aımaqtar • 24 Aqpan, 2021

Aqtóbe oblysynda 10 mektepke kúrdeli jóndeý júrgiziledi

50 ret kórsetildi

Bul týraly Aqtóbe oblystyq máslıhattyń kezekti ekinshi sessııasynda  belgili boldy dep  habarlaıdy Egemen.kz.

О́tken jylǵy bıýdjetten únemdelgen 13 mıllıard teńge qarjy men salyqtan túsken  qosymsha 6 mıllıard teńgege Muǵaljar aýdanynyń Taldysaı jáne Altyndy, Qobda aýdanynyń Terisaqqan,  Yrǵyz aýdanynyń Jarma  eldi mekenderinde tórt mektep qurylysy bastalatyn boldy. Sonyń ishinde  Taldysaı aýylyndaǵy 100 oryndyq orta mektep qurylysyna 150 mıllıon teńge,  qalǵan 60 oryndyq úsh mekteptiń árqaısysyna  100 mıllıon teńgeden bólindi.

Áıteke bı, Baıǵanın, Hromtaý aýdandaryndaǵy alty mektep, Temir, Muǵaljar aýdandarynan eki mektep, Aqtóbe qalasyndaǵy №33  orta mektep pen  polıtehnıkalyq kolledj ǵımarattaryna kúrdeli jóndeý jumystary júrgiziledi.

О́tken jyldan  únemdelgen qarjyǵa  alys eldi mekenderdiń balalaryn  mektepke tasıtyn 15  avtobýs satyp alýǵa oblystyq bıýdjetten 269 mıllıon 584 myń teńge bólindi. Bıylǵy jyl bıýdjetinde  árbir jańa avtobýstyń quny 17 mıllıon 208 myń teńgege baǵalanǵan. Qazirgi ýaqytta 9 aýdandaǵy 18 mektep avtobýsy jaraqsyz kúıde tur.  2009 jyly shyǵarylǵan birneshe  reseılik «PAZ –32053»  kólikteri  isten shyqqan. Máselen,  Áıteke bı aýdanyndaǵy Jaǵalaý eldi mekeninen Qarabutaqtaǵy T. Shevchenko atyndaǵy orta mektepke aýyldaǵy 7 balany tasıtyn avtobýs  synyp tur. Eki aýyldyń arasy 7  kılometr. Sol sııaqty Qarǵaly aýdanyndaǵy mektebi joq Kempirsaı aýylynyń  9 oqýshysy  aýdan ortalyǵy Badamsha eldi mekenindegi №2 orta mektepke baryp oqýǵa májbúr. Kempirsaı men Badamshanyń arasy 7 kılometr.

Turǵyndar sanynyń azdyǵy men iri eldi mekenge jaqyn ornalasqandyqtan, mundaı shaǵyn aýyldarda  mektep salý josparǵa engizilmegen. Desek te, qashyqtaǵy eldi mekenderdiń balalaryn tasıtyn  bir avtobýsqa jumsalatyn shyǵyn mólsheri  jylyna 7 mıllıon teńgeden artyq. Oǵan júrgizýshiniń jalaqysy,  kólik bólshekterin satyp alý men jóndeýge, janarmaıǵa  jumsalatyn shyǵyndar kiredi. 

Osy kezge deıin oqýshylardy kólikpen tasymaldaýdy  aýyl ákimderi uıymdastyryp kelse,  bıylǵy jyldan bastap  osy jumys oblystyq bilim basqarmasynyń quzyryna engizildi.

Aıta ketý kerek, Aqtóbe qalasy men aýdandarynda úıleri mektepten 3 kılometrden artyq qashyqtyqta ornalasqan 14 myń 323 oqýshy bar.  Al,  3621 mektep oqýshysyn 53  avtobýs kúndelikti tasymaldaıdy.

Sońǵy jańalyqtar

Uqsas jańalyqtar