Abaı jylyn qorytyndylady

D.Qaseıinov qazaqtyń uly perzenti Abaı Qunanbaıulynyń 175 jyldyǵyna arnalǵan halyq­ara­lyq deńgeıde birqatar is-shara uıymdastyrylǵanyn atap ótip, Eýrazııa ýnıver­sıtetindegi kezdesý sonyń qory­tyndysy ispetti dedi. «Bizdiń uıymnyń maqsaty túrkitektes ha­lyqtardan shyǵyp, adamzat órke­nıetine olja salǵan uly tul­ǵalardy ulyqtaý. Biz ony birneshe baǵytta júrgizemiz. Albom shyǵarý isi de sondaı serııaly jobalardyń qatarynda. Mysaly, dál osy joba boıynsha 2018 jyly  Shyńǵys Aıtmatovqa arnalǵan albom jaryq kórdi. 2019 jyly «Úsh arys» albomy jaryq kórdi. Byltyr túrik dúnıesiniń iri aqyny Nızamıdiń 880 jyldyǵyna arnap albom jasaýǵa kiristik. Bıyl mine, «Abaı» albomy jaryq kórdi. Al­­bom qazaqtyń uly aqyny Abaı Qunanbaıulynyń 175 jyldyq mereıtoıyna halyqaralyq uıymnyń arnaıy syıy», dedi ol.

Bas hatshynyń aıtýynsha, uly aqynnyń beınesi men onyń shy­ǵarmashylyǵyn keskin­deý arqyly óner týdyratyn qyl­qalam sheberleriniń kózimen tanytý maqsat etilgen. Jınaqqa ótken ǵasyrdaǵy jáne qazirgi za­manǵy belgili otandyq qyl­qalam sheberleriniń Abaı shyǵar­malaryn oqı otyryp dúnıege ákelgen kórkemsýret týyndylary engizilgen. Albomdy halyq­aralyq uıymnyń tapsyrysymen Central Asia Production kompanııa­sy aǵylshyn tilinde Túrkııada basyp shyǵarǵan. Al oǵan Abaı men Shákárim shyǵarmalaryn dúnıe júzine nasıhattaýda qarjy quıyp júrgen belgili mesenat Medǵat Quljanov demeýshilik jasaǵan.

Albomnyń tanystyrylymynda Halyqaralyq uıymnyń qazaq rýhanııatyna sińirip jatqan eńbegi men Abaıdyń 175 jyldyq mereıtoıy barysynda atqarylǵan is-sharalar tóńire­ginde Sultan Orazalın, Ǵarı­folla Esim, Serik Negımov syndy belgili ǵalymdar men qoǵam qaıratkerleri sóz aldy.

 Jıyn sońynda  Halyqaralyq uıymnyń Bas hatshysy hakim Abaıdyń 175 jyldyq mereı­toıy­nyń qorytyndysyna oraı uıym atynan Halyqaralyq «Abaı» medali men «Qurmet» gra­mo­tasyn aıtýly mereıtoıǵa arnap akademııalyq basylymdar men ki­taptar daıyndaǵan, maqa­lalar jazǵan, shyǵarmashylyq jumys­tardy uıymdastyrǵan zııa­ly qaýym ókilderine tapsyrdy.

Sondaı-aq halyqaralyq uıym taǵaıyndaǵan atalǵan marapattar «Egemen Qazaqstan» gazetiniń basshylyǵyna da be­rildi.