Qosymsha bilimniń bala ómirinde, onyń adam, maman bolyp qalyptasýynda róli zor. Bul týraly biz bas basylym betine «Kóleńkede qalǵan qosymsha bilim» degen taqyryppen shyqqan kólemdi materıalymyzda keńirek jazǵanbyz. Bilim jáne ǵylym mınıstrliginiń alqa otyrysynda qosymsha bilimde atqarylǵan ister men aldaǵy mindetter týraly aıtyldy.
«Jaqynda qabyldanǵan zań sheńberinde qosymsha bilim alýǵa keń múmkindik berý úshin memlekettik tapsyrys ornalastyrylady. Bul da konkýrs negizinde ótedi. Jekemenshik uıymdarǵa ornalastyrylǵannan keıin qosymsha bilimmen qamtý deńgeıin áldeqaıda ulǵaıtýǵa múmkindik týatyny sózsiz. Qosymsha bilim berý uıymdaryn damytý boıynsha keıbir óńirde biriktirý, ońtaılandyrý, jabý boıynsha bastamalar oryn alyp jatyr. Mundaı bastamalardy toqtatyp, bul uıymdardy jappaı damytýymyz kerek», dedi mınıstr.
PISA – Bilim alýshylardyń jetistigin halyqaralyq baǵalaý baǵdarlamasynyń nátıjeleri qazaqstandyq balalardyń oqý saýattylyǵy tym tómendep ketkenin kórsetti. Oqýshylardyń saýattylyǵyn arttyrýda kórkem ádebıet kitaptaryn oqýdyń orny erek. Al olardyń mektepte kitap oqýǵa degen qyzyǵýshylyǵyn oıatatyn mamandar eleýsiz qalyp keldi. Osyǵan deıin biz «Mektep kitaphanashylarynyń mindeti nege naqtylanbaǵan?» atty problemalyq maqalamyzda 4 jyl pedagogıkalyq oqý ornynda oqyp mamandanǵan, 20 jyldan beri mektepte balalardyń zeıinin ashýmen aınalysyp júrgen kásip ıesiniń jarymaıtyn jalaqyǵa jumys istep júrgenin jazǵanbyz. Bıyl bul túıtkildiń túıini tarqatylmaq. Másele túbegeıli sheshilmegenimen, seń qozǵaldy deýge bolady. Vedomstvo basshysy A.Aımaǵambetov atalǵan máselege qatysty: «Qazirgi ýaqytta «Oqýǵa qushtar mektep» jobasyn iske qosyp jatyrmyz. Onyń aıasynda mekteptegi kitaphanalar qorynda memlekettik tildegi kórkem ádebıetti aıtarlyqtaı jańartý mindeti tur. Sondyqtan mundaı máseleni biz bıyl sheshýimiz kerek. Osy rette bizdiń kitaphanada isteıtin áriptesterimiz – kitaphanashylardyń jalaqysyn kóterý máselesi de óte ózekti. Bul boıynsha Memleket basshysy tıisti tapsyrmany bergen bolatyn. Sondyqtan osy jumysty bıyl jalǵastyramyz», dedi.
