Alǵashqy kezeń aıasynda 10,5 shaqyrym elektr jelisi tartylyp, 31 shaqyrym jol salyndy, 56 shaqyrym sý jáne 58 shaqyrym gaz tartý qurylystary aıaqtaldy. Sondaı-aq «Aqtaý teńiz porty» arnaıy ekonomıkalyq aımaǵynyń aýmaǵynda ótken jyly «Rıksos» qonaqúı kesheni jobasynyń birinshi kezeńi iske qosyldy, ashylǵan jyly-aq qonaqúıge 78 myńnan astam adam kelip, 68 mlrd teńge ınvestısııa tartyldy, qonaqúı 600-den astam adamdy jumyspen qamtyp otyr, bul – óńirdegi jumyssyzdyq máselesin sheshýge kómek.
Qazir Aqtaýda kýrortty aımaqty damytýdyń ekinshi kezeńi qarqyndy júrgizilýde. Prezıdent Q.Toqaevtyń tapsyrmasyna sáıkes Úkimettiń qoldaýymen qosymsha qarjy bólinip, jyly jaǵajaı aýmaǵyn sýmen, elektr energııasymen, gazben jabdyqtaý jáne avtomobıl joldaryn salý jumystary jasalýda. Eki jyl ishinde Aqtaýda 400 mlrd teńgege iri týrıstik jobalar júzege asyrylady.
Joba aıasynda júzege asyp jatqan jumystardyń biri Tethys International Hub Ltd kompanııasynyń 202 mlrd teńge qarjy quıyp, teńiz jaǵalaýynan salyp jatqan tórt nysanyn aıtýǵa bolady. Tolyq iske qosylǵan soń 1380 jańa jumys orny ashylady. Alǵashqysy – halyqqa qoljetimdi bolatyn taqyryptyq oıyn-saýyq parki. Munda otbasylyq demalys úshin sýdaǵy, jerdegi jáne áýedegi attraksıondar salynady. Saıabaqtyń orta tusynda sýburqaq, meıramhana, fýdkort pen azyq-túlik dúńgirshekteri ornalasady. Bıyl shilde-tamyz aılarynda aıaqtaý mejelengen bul saıabaqqa kúnine shamamen 4,5 myń adam keledi degen jospar bar. Saıabaq janynda golf-klýb pen 300 nómirli golf-otel boı kóteredi. Sonymen qatar kóne shahar stılindegi Town Center saýda qatarlaryn salýdy da josparlap otyr. Sońǵy úsh nysandy paıdalanýǵa berý keler jyldyń enshisinde. Kýrortty aımaqty uzyndyǵy 2,5 shaqyrym, eni 11 metr bolatyn serýendeý aýmaǵy jalǵaıtyn bolady. Munda jaıaý júrýge jáne velosıped tebýge bolady, – deıdi Mańǵystaý oblysy ákiminiń orynbasary Bekbol Orynbasarov.
Onyń aıtýynsha, BI Group kompanııasy demalys pen turǵyn úı keshenin salyp jatyr. Quny 37 mlrd teńgeni quraıtyn turǵyn úı kesheni vıllalar men apartamentterden turady. Keshendi 2022 jyly paıdalanýǵa berý josparlanýda. Sondaı-aq 15 gektar aýmaqta Double Tree by Hilton álemdik brendtegi 4 juldyzdy qonaqúıi boı kótermek.
Al Bazis-A qurylys korparosııasy da teńiz jaǵalaýyna 10 gektar jerge vılla, taýnhaýs jáne apartamentterden turatyn turǵyn úı keshenin turǵyzyp jatyr. Qurylys kompanııasy ókilderiniń aıtýynsha, qazaqstandyqtar úshin kýrortty aımaqta ornalasqan jyljymaıtyn múlikke qarjy quıyp, teńiz jaǵalaýynda turýǵa jáne demalýǵa zor múmkindik týady.
«Aqtaý teńiz porty» arnaıy ekonomıkalyq aımaǵynda ornalasqan jobalardy iske asyrý óńirge qosymsha ınvestısııalar tartýǵa, týrısterdiń kelýine, jańa jumys oryndarynyń qurylýyna, salyq aýdarymdarynyń túsýine, sondaı-aq ekonomıkanyń aralas salalarynyń órkendeýine yqpal etip, oblystyń áleýmettik-ekonomıkalyq damýyna oń serpin bermek.
Aqtaýda qolǵa alynǵan zamanaýı jobalar qala kórkin asyryp, turǵyndardyń kóńilin ósirse, kelimdi-ketimdi qonaqtardyń kóz qýanyshyna aınalsa deımiz.
Mańǵystaý oblysy
