QR-nyń «jasyl ekonomıkaǵa» kóshýi jónindegi 2013-2020 jyldarǵa arnalǵan tujyrymdamanyń is-sharalar josparyn iske asyrý barysy týraly ekologııa, geologııa jáne tabıǵı resýrstar mınıstri Maǵzum Myrzaǵalıev, Almaty oblysynyń ákimi Amandyq Batalov, Qostanaı oblysy ákiminiń orynbasary Vıktor Ionenko, eń ozyq qoljetimdi tehnologııalar anyqtamalyqtaryn ázirleý týraly «Halyqaralyq jasyl tehnologııalar men ınvestısııalyq jobalar ortalyǵy» KEAQ basqarma tóraǵasynyń m. a. Janar Igenova baıandady.
QR-nyń «jasyl ekonomıkaǵa» kóshýi jónindegi 2013-2020 jyldarǵa arnalǵan tujyrymdamany iske asyrý aıasynda aýyl sharýashylyǵyndaǵy eńbek ónimdiligi 4,83 esege ulǵaıdy, elektr energııasyn óndirýdegi jańartylatyn energııa kózderiniń (JEK) úlesi 3%-ǵa deıin, gaz elektr stansııalarynyń úlesi 20,2%-ǵa deıin artty.
Qalalarda ortalyq aýyz sýmen jabdyqtaý júıesi turaqty túrde qoljetimdi sý paıdalanýshylardyń úlesi 97,5%-ǵa, aýyldyq jerlerde 90,1%-ǵa jetti. JIО́-niń energııa syıymdylyǵy 2008 jylǵy kórsetkishten 33,1%-ǵa tómendedi. Ornyqty damý mindetterin iske asyrý maqsatynda Qazaqstanda jańa Ekologııalyq kodeks qabyldandy, ol bıylǵy 1 shildede kúshine enedi jáne Eýropalyq odaq elderiniń tájirıbesi boıynsha eń ozyq qoljetimdi tehnologııalar (OQT) kórsetkishterin paıdalaný arqyly kásiporyndardy óndiristi jańǵyrtýǵa yntalandyrýdy kózdeıdi.
OQT bıýrosy júrgizgen QR ónerkásibiniń negizgi salalary kásiporyndarynyń keshendi tehnologııalyq aýdıti negizinde eń ozyq qoljetimdi tehnologııalar boıynsha anyqtamalyqtar ázirlenýde. Tehnıkalyq jumys toptarynyń quramyna ónerkásip kásiporyndarynyń, memlekettik organdardyń, salalyq jáne ekologııalyq qaýymdastyqtardyń, ǵylymı jáne jobalaý uıymdarynyń, joǵary oqý oryndarynyń 335 ókili kirdi.
Halyqaralyq konsýltanttarmen ózara is-qımyl júzege asyrylady. Qazirgi tańda «Energııa óndirý maqsatynda iri qondyrǵylarda otyndy jaǵý», «Munaı men gazdy qaıta óńdeý», «Beıorganıkalyq hımııalyq zattar óndirisi», «Sement jáne ák óndirisi», «Sharýashylyq jáne (nemese) ózge de qyzmetti júzege asyrý kezindegi energetıkalyq tıimdilik» anyqtamalyqtary qaralyp jatyr. 2022 jylǵa 9 anyqtamalyq ázirleý josparlanǵan. Aldaǵy kezeńde OQT boıynsha keminde 30 salalyq jáne salaaralyq anyqtamalyqtar ázirleý josparlanýda.
OQT boıynsha anyqtamalar jáne tıisti qorytyndylar QR Úkimetiniń qaýlysymen bekitiledi. Úkimet basshysy Qazaqstannyń Parıj kelisimi boıynsha qabyldaǵan halyqaralyq mindettemelerin jáne 2030 jylǵa deıingi Turaqty damý salasyndaǵy kún tártibin, sondaı-aq ázirlenip jatqan «Jasyl Qazaqstan» ulttyq jobasyn eskere otyryp, QR-nyń «jasyl ekonomıkaǵa» kóshýi jónindegi tujyrymdamany ózektendirýdi tapsyrdy.
