Kúni keshe ǵana oblys ortalyǵynyń shyǵys jaq betkeıi qoıý tútinge bókti. Kókshetaý-Shýchınsk baǵytyndaǵy jol boıy, Podhoz eldi mekeniniń tóńiregindegi 20 gektar jer jalynǵa oranyp, qaýlaǵan órttiń bir sheti 0,5 gektar ormandy sharpydy. О́rt sóndirýge júzden astam órt sóndirýshi men orman sharýashylyǵy qyzmetkeri jumyldyryldy. Abyroı bolǵanda, jalynnyń saldarynan jaraqat alǵandar joq.
Bıyl kún eresen ystyq bolyp tur. О́tken demalys kúnderi oblys aýmaǵynyń keı jerlerinde aýa temperatýrasy 40 gradýsqa deıin kóterildi. Sońǵy bir aptanyń ishinde 8 orman órti boldy. Kelimdi-ketimdi kisisi kóp Zerendi aýdanynyń kýrortty aımaǵynda 4 oqıǵa oryn alsa, Aqkól aýdanynda 3 márte orman-toǵaı órtenip, Ereımenniń etegin de jalyn sharpydy. Alapat órt Birjan sal aýdanynda boldy. Tilsiz jaý 1480 gektardy qamtydy. Krasnoflot eldi mekeniniń turǵyny órt saldarynan qaza tapty.
Negizinen, tabıǵı órt Birjan sal, Ereımentaý, Aqkól aýdandarynda jıi shyǵyp tur. Mamandardyń aıtýyna qaraǵanda, dalanyń tańdaıy keýip, qýrap turǵandyqtan, abaısyzda oılanbaı tastaı salǵan bir tal temekiniń tuqyly jetip jatyr. Tipti qaý shóptiń ústinde jatqan áınektiń synyǵy da qýraǵan shóptiń tutanýyna sebepshi.
О́rt saldarynan tabıǵat zııan shegip jatyr. Ormannyń qalpyna kelýine uzaq ýaqyt qajet ekeni belgili. Al dala órtiniń kesirinen jyp-jylmaǵaı bolǵan jaıylymdar men shabyndyqtar bıylǵydaı qýańshylyq jyly altyn jamylǵan atyraptan da qymbat edi. Qalaı bolǵan kúnde de dalanyń dıdaryn, tabıǵattyń ıen baılyǵy – ormanymyzdy oısyratpaı saqtap qalý úshin árkimge de muqııat bolý kerek.
Aqmola oblysy
