Eki eldiń mádenıet salasyna jaýapty mınıstrleriniń júzdesýine Qazaqstannyń Belarýs Respýblıkasyndaǵy Tótenshe jáne ókiletti elshisi, TMD Jarǵylyq organdary janyndaǵy Turaqty ókil qyzmetin qosa atqarýshy Asqar Beısenbaev pen «Qazaqkonsert» memlekettik konsert uıymynyń dırektory Jeńis Seıdýllauly da qatysty.
Aldymen Aqtoty Raıymqulova búginde eki el arasyndaǵy tatý kórshilik qarym-qatynas turaqty damyp, mádenı-gýmanıtarlyq baılanys eki halyq arasyn baılanystyrýshy kópirge aınalyp kele jatqanyn atap ótti.
«Yntymaqtastyq aıasynda birqatar aýqymdy mádenı joba júzege asyp jatyr. Máselen, elimizdiń ókilderi «Belarýs kitaptary» halyqaralyq jármeńkesine, Vıtebskidegi «Slavıan bazary» halyqaralyq óner festıvaline, «Listapad» halyqaralyq kınofestıvali syndy mamandandyrylǵan mádenı is-sharalarǵa turaqty túrde qatysady. Belarýs halqynyń mádenı murasyn elimizde tanytý sheńberinde Belarýs pen Qazaqstannyń memlekettik muraǵattary men murajaılary arasynda áriptestik ornatyldy. Sonymen qatar ádebıet pen óner, kınematografııa qaıratkerleri arasynda seriktestik jandanyp keledi», dedi vedomstvo basshysy.
Aıta keteıik, bıyl Belarýs Respýblıkasynda rejısser Bekbolat Shekerovtiń «1941 jyldyń jazy» atty kórkem fılminiń túsirilimi ótken bolatyn. Bul Uly Jeńistiń 75 jyldyǵyna jáne Ekinshi dúnıejúzilik soǵysqa qatysýshy, ǵalym, jazýshy jáne qoǵam qaıratkeri Ádı Sháripovtiń jaýyngerlik joly jaıly tarıhı týyndy.
Oǵan qosa jyl saıyn dástúrli túrde Vıtebskide ótetin «Slavıan bazary» halyqaralyq óner festıvali TMD kóleminde ǵana emes, qurlyq aralyq deńgeıde tanylǵan jobaǵa aınalyp úlgerdi. Bizdiń ónerpazdar uzaq jyldan beri «Slavıan bazaryna» turaqty qatysyp, júldegerler qatarynan kórinip júr. Jalpy, onda qazaqtyń qanjyǵasy bos qaıtqan emes. Kezinde dúldúl ánshi Dımash Qudaıbergen osy festıvalge qatysyp, baǵy janǵan edi. Ony da aıta ketkenimiz jón shyǵar. Búginde sol dodada qazylar qatarynda otyr.
Al bıyl Qazaqstan atynan estrada oryndaýshylary baıqaýynda Qazaq ulttyq óner ýnıversıtetiniń 3-kýrs stýdenti Rýhııa Baıdúkenova baq synap, mereıimizdi ósirdi. Endi HIH halyqaralyq balalar mýzykalyq baıqaýyna «Boztorǵaı-2019» halyqaralyq balalar shyǵarmashylyǵy baıqaýynyń jeńimpazy 10 jastaǵy Amına Asgatova qatysady. Onyń da jetistikke jeterine senim sol.
Kezdesý barysynda Qazaqstan Respýblıkasynyń Mádenıet jáne sport mınıstri Aqtoty Raıymqulova eki memlekettiń mádenıet kúnderin ótkizý mádenı-gýmanıtarlyq saladaǵy yntymaqtastyqty nyǵaıtýda mańyzdy qadam ekenin jetkizdi.
«2018 jyly Belarýs Respýblıkasynda Qazaqstannyń Mádenıet kúnderi uıymdastyryldy. Bıyl 30 qyrkúıekten bastap 3 qazanǵa deıin elimizde Belarýs Respýblıkasynyń Mádenıet kúnderin ótkizýdi josparlap otyrmyz. Mádenıet kúnderi aıasynda Belarýs Respýblıkasynyń úzdik shyǵarmashylyq ujymdary óner kórsetedi. Osy mádenıet kúnderi aıasynda Belarýs kınosynyń kúnderin ótkizý josparda bar. Bizdiń «Qazaqkonsert» memlekettik konsert uıymy Belarýs memlekettik fılarmonııasymen Memorandýmǵa qol qoıý máselesin talqylaýǵa daıyn», dedi A.Raıymqulova.
Sondaı-aq Belarýs Respýblıkasynyń jeke oryndaýshylary men shyǵarmashylyq ujymdaryn 2022 jyly ótetin «Operalııa» halyqaralyq festıvaline, Bıbigúl Tólegenovanyń Halyqaralyq vokalıster baıqaýyna, mýzyka aspaptarynda oryndaýshylardyń halyqaralyq televızııalyq balalar baıqaýy syndy is-sharalarǵa qatysýǵa shaqyrdy. Eki taraptyń osy is-sharalarǵa qatysýy ózara is-qımylǵa jańa serpin beretinine, mádenıet pen óner salasynda baılanys ornatýǵa jáne tájirıbe almasýǵa yqpal etetinine senimdi ekenin jetkizdi.
О́z kezeginde Anatolıı Markevıch eki memleket arasyndaǵy mádenı-gýmanıtarlyq baılanysty Belarýs taraby jandandyrýǵa nıetti ekenin tilge tıek etti.
«Eki eldiń óner, ádebıet, sport jáne ózge saladaǵy qaıratkerleriniń baılanysy uzaq jyldan beri jalǵasyp keledi. Sizderdiń osy kezdesý barysynda aıtqan usynystaryńyzdy qarastyryp, pandemııaǵa qaramastan áriptestiktiń órisin keńeıtýge daıyn ekenimizdi jetkizemin», dedi A.Markevıch.
