Beınerolıkke Jambyl atyndaǵy Qazaq memlekettik fılarmonııasynyń jeke oryndaýshylary Erjan Álimbetov (dombyra), Fedor Artamonov (vıolonchel), B.Baıqadamov atyndaǵy Memlekettik hor kapellasynyń ártisi Indıra Qudabaeva (vokal), STEPPE SONS alternatıv-folk tobynyń múshesi Muratbek Ramanqulov sekildi qazaq mýzykanttarymen qatar, japondyq mýzykanttar Iýmıko Fýrýhashı (morınhýýr), Takeshı Takeýchı (elektrli bas), Týzan Hırano (sıakýhachı), Aı Iаmagýchı (vokal) da atsalysty.
Ártister birigip Rokýsýke Eıdiń sózine, kompozıtor Hatıdaı Nakamýranyń mýzykasyna jazylǵan japondyq ánshi Kıý Sakamotonyń áıgili Sukiyaki ánin oryndady. Bul án elý jyl buryn shyqqan. Japonııanyń ózinde, birneshe memlekettiń top-chartynda, sonyń ishinde amerıkalyq Billboard hot 100 chartynda birinshi oryndardy ıemdengen. Sonymen qatar mýzykanttar áıgili qazaqtyń «Kózińniń móldirin-aı» atty halyq ánin naqyshyna keltirip oryndady.
– Meniń oıymsha, qazaq mýzykanttarymen birigip jasaǵan kompozısııamyz óte jyly ári shynaıy shyqqan sekildi. Bul shyǵarmashylyq kollaborasııa keremet boldy, men jumys qorytyndysyna tańǵalyp otyrmyn. Jobaǵa qatysqan barsha mýzykanttarǵa jáne jobaǵa qatysýǵa shaqyrǵan Serik Nurmoldaevqa alǵysymyz sheksiz! – dep jazdy óziniń jeke paraqshasynda jobaǵa qatysýshylardyń biri Iýmıko Fýrýhashı.
Joba mýzykanttardyń kompozısııaǵa qazaq jáne japon halyqtarynyń kóne mýzykalyq aspaptaryn paıdalanýymen jáne ánderdiń túpnusqadaǵy tilde oryndalýymen erekshelengen. Beınerolıkte eki memlekettiń aıryqsha tabıǵaty men kóne salt-dástúrleri kórsetildi.
