Ústimizdegi jyly aýdanda «Aýyl – el besigi» baǵdarlamasy boıynsha bir ǵana qurylys salasynda 35 joba júzege asyrylýda. Joba boıynsha 2821,9 mln teńge qarajat bólingen. Áleýmettik-turmystyq mekemelerdiń ınjenerlik ınfraqurylymdary jóndelmek, bilim oshaqtary kúrdeli jóndeýden ótkizilip, jańasha keıipke engizilmek. Taratyp aıtatuǵyn bolsaq, kópten beri qordalanyp qalǵan máselelerdiń baǵdarlama arqyly júrgiziletin jumystyń arqasynda sheshilip, keıbir kónergen ǵımarattardyń qaıtadan el ıgiligine jaraıtyndyǵy daý týdyrmaıdy. El ishinde kóńilge alań týǵyzǵan máseleler az emes edi. Ásirese, aýdan ishindegi jol jaıy. Bıyl kóp tilegi qabyl bolyp, Jaqsy aýylynyń Abaı, Stepnaıa-1, Stepnaıa-2 kóshelerine ortasha jóndeý jumystary júrgizilýde.
– Memleket tarapynan kórsetilip otyrǵan qamqorlyqtyń arqasynda aýylymyzdyń bet-beınesi ózgerip, ádemi bolyp qaldy, – deıdi el aǵasy Omar Qosshyǵulov, – qansha kútip ustasa da joldyń tozatyndyǵy belgili. Bıylǵy jyly birneshe kóshege jóndeý jumystary júrgizilip, kópshilikke qolaıly jaǵdaı týǵyzylyp otyr. Ánsheıinde aýylǵa eshkim kóńil bólmeıdi degen pikir aıtylyp jatady. Nege bólinbesin, Jaqsydaǵy jaqsy sharýalardan qamqorlyqtyń qanshalyqty mol ekendigin ańǵarýǵa bolady. Qazir aýyl turǵyndary qurylysty, ásirese kúrdeli jóndeý jumystarynyń qarqyndy júrgizilip jatqandyǵyn kózderimen kórip otyr.
Aıtsa aıtqandaı, bir ǵana Zaporoje aýylynda tórt birdeı joba qolǵa alynyp, onyń ekeýi boıynsha jumys bastalyp ketken. Sondaı-aq Lozovoe selosynda da 5 joba júrgizilse, Belaǵashta 5, Qımada 5 joba qolǵa alynǵan. Tyńǵylyqty atqarylǵan jumystyń arqasynda bul aýyldardyń beınesi esh jerden kem bolmaıdy.
Jaqsy aýylynyń ózinde mamyr aıynan beri aýdandyq mádenıet úıi kúrdeli jóndeýden ótkizilýde. Joba boıynsha bólingen qarajattyń kólemi 213,9 mıllıon teńgeni quraıdy. Buryn sál tozyp ketken mádenıet úıiniń kire berisinen bastap, ishki bólmeleri de jańartylyp, zaman talabyna saı árlendirilip, qulpyrtylýda. Aldaǵy ýaqytta oıǵa alǵan jumys túgel aıaqtalǵan kezde aýyldyń ortalyǵyndaǵy mádenıet úıi turǵyndardyń rýhanı dúnıesiniń kemeldenýine kelisti úles qosatyn orynǵa aınalmaq.
Zaporoje selosyndaǵy orta mekteptiń tek qabyrǵalary ǵana qalǵan, qalǵanynyń bárin qurylysshylar qoparyp alyp tastapty. 1975 jyly salynǵan eki qabatty ǵımarat kópten beri qurylysshynyń qalaǵy tımegen soń tozyńqyraǵan jaıy bar eken. Endi joba boıynsha bólingen qarajatqa mekteptiń edeni, tóbesi, terezesi, syrtqy qaptaýy, qorshaýy, elektr jelileri túp-túgel aýystyrylmaq. Aýqymy atshaptyrym mektep janyndaǵy alań jańadan qorshalyp, abattandyrylmaq. Aýyl balalary mektep janyndaǵy sport zalynda túrli úıirmelerge qatysa alady. Qazirdiń ózinde eńseli, keń sport zaldyń reńi kirip qalǵan. Qurylys jumystarymen 45 adam aınalysýda. Áýelgi kelisim boıynsha 8 aıda túgel aıaqtap shyǵý kerek.
– Qurylysshylar ýaqytpen sanaspaı jumys istep jatyr, – deıdi qurylys brıgadasynyń brıgadıri Elýbaı Tólegenuly, – jalpy kólemi eki myń sharshy metrdi quraıtyn mektepti jańadan salyp shyqtyq dese de bolǵandaı. Jumysqa jergilikti turǵyndar da tartylyp otyr. Al negizgi mamandar ózimizdiń brıgadanyń sheberleri.
Aýyldaǵy oń oqıǵa osyndaı bolǵanda, aýdan ortalyǵyndaǵy qaýyrt sharýa kóz súısindiredi. Jaqsy aýylyndaǵy oqýshylar úıin jóndeýge qyrýar qarajat bólinip otyr. Sheber qoldy qurylysshylar óz mindetterin tap-tuınaqtaı etip atqarýda. Osyndaǵy №1 jáne №2 orta mektepterge kúrdeli jóndeý jumystary júrgiziledi. Munyń barlyǵy el bolashaǵy úshin jasalyp jatqan aıtýly qamqorlyq dep aıtsaq, jarasymdy.
Jaqsynyń jaǵymdy jańalyǵy az emes. Máselen, deneshynyqtyrý-saýyqtyrý kesheni qolǵa alynǵan. Oǵan 585,6 mıllıon teńge qarajat bólinip otyr. Shalǵaıdaǵy shaǵyn aýyl úshin aq túıeniń qarny jarylǵan olja ispetti dúnıe. Shaǵyn fýtbol alańy da salynbaq.
Shoq juldyzdaı shaǵyn aýyl alǵa basqan zamana qadamymen qatar adymdap, kórkeıip keledi. El de erteńine senimdi. Eń bastysy, sol emes pe?!
Aqmola oblysy,
Jaqsy aýdany
