Bul máseleler qurylys, kólik, saýda, turmystyq-qatty qaldyqtardy shyǵarý jáne sıfrlandyrý máseleleri jónindegi oblystyq máslıhattyń turaqty komıssııasy otyrysynyń qaraýyna engizildi.
Aqtóbe qalasynyń ákimi Ashat Shaharovtyń aıtýynsha, úı mańyndaǵy jasyl jelekti túgendeý barysynda jasyl jelekterdiń 55-ten astam túri anyqtaldy.
— Bul biryńǵaı derekter bazasyn qurýǵa, jasyl jelekterdi esepke alý men kútip ustaýdy júıelendirýge múmkindik berdi, — dep tolyqtyrdy qala basshysy.
Qurylys, sáýlet jáne qala qurylysy basqarmasynyń basshysy Naǵymjan Aldııarovtyń málimetteri boıynsha, aýdandarda qazirgi ýaqytta oblystyń tek 85 eldi mekenine túgendeý júrgizildi. Eldi mekenderdiń dendrologııalyq josparynyń tolyq bolmaýyna baılanysty oblys boıynsha aǵash egýdiń bekitilgen kólemin oryndamaý qaýpi bar.
Tabıǵı resýrstar jáne tabıǵatty paıdalanýdy retteý basqarmasynyń basshysy Ánýarbek Bermaǵambetov otyrysqa qatysýshylarǵa oblysta 12 turmystyq-qatty qaldyqtar polıgony jumys isteıtinin baıandady. Olardyń sońǵysy, kommýnaldyq polıgon, 2015 jyly Hromtaý qalasynda salynǵan jáne 5 jyldan astam ýaqyt boıy polıgondar qurylysyna qarajat bólingen joq.
— 2021 jyly osy polıgondardyń qurylysy aıaqtalady, — dep habarlady baıandamashy. — 2023 jyly Oıyl, Yrǵyz, Temirbek Júrgenov jáne Qarabutaq aýyldarynda 4 polıgon salý josparlanýda. Sonymen qatar oblysta 456 stıhııalyq qoqys orny anyqtaldy.
Jergilikti joldardyń jaǵdaıyn jaqsartý boıynsha jumystar týraly baıandaı otyryp, jolaýshylar kóligi jáne avtomobıl joldary basqarmasynyń basshysy Aıbek Qaıyr osy baǵytta bıyl 23,5 mlrd teńgege josparlanǵan 144 joba iske asyrylyp jatqanyn habarlady.
— Kelesi jyldyń 1 qańtaryna qaraı jergilikti mańyzy bar avtomobıl joldarynyń 66 paıyzyn qanaǵattanarlyq jaǵdaıǵa jetkizý josparlanýda, — dedi ol.
