Sharaǵa Mańǵystaý oblysynyń ákimi Nurlan Noǵaev qatysty.
Aldymen oblys ákimi sóz sóılep, jıynǵa kelgen Ánes Tólendiulynyń jubaıy prozaık, dramatýrg, qoǵam qaıratkeri Altynshash Qaıyrjanqyzy Jaǵanova men Qazaqstan Jazýshylar odaǵynyń basqarma tóraǵasynyń orynbasary, qoǵam qaıratkeri Qulkenov Mereke Ábdeshulyn tanystyrdy.
«Búgin biz mereıtoı aıasynda uıymdastyrylyp otyrǵan elimizdiń tól perzenti, jazýshy, dramatýrg, Qazaqstannyń eńbek sińirgen qaıratkeri, Qazaqstan Respýblıkasynyń Memlekettik syılyǵynyń laýreaty, «Barys» jáne «Parasat» ordenderiniń ıegeri, Ánes Saraı Tólendiuly aǵamyzdyń «Adaı tarıhy» kitabynyń tusaýkeser rásimine jınalyp otyrmyz.
Olaı bolsa, baspadan jaqynda ǵana shyqqan, áli sııasy da keppegen kórkem bezendirilgen mazmundy kitaptyń lentasyn kesý mártebesin aqyn, sáýletshi, Qazaqstannyń eńbek sińirgen qaıratkeri, Qazaqstan Jazýshylar Odaǵynyń múshesi Saıyn Nazarbek aǵamyzǵa jáne ólketanýshy, jazýshy, Qazaqstan Jazýshylar Odaǵynyń múshesi Otynshy Kóshbaıuly aǵamyzǵa usynamyn», dedi oblys ákimi
Sharanyń negizgi bólimi, ıaǵnı kitaptyń tusaýkeserinen soń sóz kezegi O. Kóshbaıuly men M. Qulkenovke berildi. Sonymen qatar búgingi jıynǵa qatysa almaǵan el aǵalarynyń beınejazbasy kópshilikke kórsetildi.
Ánes Tólendiulynyń el tarıhyn, onyń ishinde Mańǵystaý tarıhyn zertteýge qosqan úlesi zor. Ol qazaq tarıhyna qatysty buryn aıtylmaı, aınalysqa túspeı júrgen ǵylymı derekterdi zerttep, «Edil-Jaıyq» trılogııasy, «Isataı men Mahambet», «Asyldyń synyǵy», taǵy da basqa ádebı eńbekterdi jaryqqa shyǵardy. Osy rette aımaq basshysy Nurlan Asqaruly óńirdegi tarıhı eskertkishter boıynsha Mańǵystaý oblystyq mádenıet, arhıvter jáne qujattama basqarmasynyń basshysy Sarmýrzına Pánııa Ońalbaıqyzyna birneshe tapsyrma berdi.
Ánes Tólendiuly 1937 jyly Reseıde, Astrahan oblysy, Volodarskıı aýdany, Kirmalaı aýylynda týǵan. QazUÝ-dy bitirgen. «Egemen Qazaqstan», «Jas Alash» gazetterinde ádebı qyzmetker, bólim meńgerýshisi, «Jazýshy» baspasynda redaktor, Qazaqstan jazýshylar odaǵynda ádebı keńesshi bolyp qyzmet atqarǵan.
Buǵan deıin jazýshynyń «Munarlar shaqyrady» degen atpen alǵashqy áńgimeler jınaǵy 1969 jyly jaryq kórdi. 1989 jyly orys tilinde «Qarasha aıy kelgende» kitaby shyqty. Aǵamyzdyń «Qý tazsha», «Arý Almaty», «Muqym meniń», «Ańsaý», «Tymyrsyq» pesalaryn bilemiz. «Biz – jastarmyz», «Ataman Annenkovtyń kúıreýi» fılmderiniń ssenarıılerin jazǵan. Aǵamyz «Edil-Jaıyq» romany úshin 1992 jyly QR Memlekettik syılyǵyna ıe bolǵan.
