Olardyń árqaısysy 2000 AEK - 5 mln 834 myń teńge kóleminde syıaqy alady.
Konkýrsqa qatysý úshin barlyǵy 7 baǵyt boıynsha 575 ótinim kelip tústi: «Jaratylystaný ǵylymdary», «Injınırıng jáne tehnologııalar», «Medısına jáne densaýlyq saqtaý», «Áleýmettik jáne gýmanıtarlyq ǵylymdar», «Aýyl sharýashylyǵy jáne veterınarııa ǵylymdary», «Áskerı ǵylymdar jáne ulttyq qaýipsizdik».
Nátıjesinde, komıssııa 6 ǴZI men 16 JOO-dan 50 ǵalymǵa «Úzdik ǵylymı qyzmetker-2021» syılyǵyn berý týraly sheshim qabyldady.
Olardyń arasynda L. N. Gýmılev atyndaǵy Eýrazııa ulttyq ýnıversıtetiniń professory Rahmetqajy Bersimbaı, Iаdrolyq fızıka ınstıtýty fılıalynyń jetekshisi Maksım Zdoroves, Qaraǵandy tehnıkalyq ýnıversıtetiniń professory Arıstotel Isagýlov, Onkologııa jáne radıologııa ǴZI Basqarma tóraıymy Dılıara Qaıdarova, Ál-Farabı atyndaǵy Qazaq ulttyq ýnıversıtetiniń professory Qaırat Dáýletov, Qazaq ulttyq agrarlyq zertteý ýnıversıtetiniń professory Qaısar Tabynov jáne basqalary qatysty.
Jyl saıynǵy «Úzdik ǵylymı qyzmetker» syılyǵy ǵylym men tehnıkanyń damýyna eleýli úles qosqan ǵalymdardy, ǵylymı qyzmetkerlerdi qoldaýǵa jáne kótermeleýge baǵyttalǵan.
«Memleket basshysynyń tapsyrmasy boıynsha Bilim jáne ǵylym mınıstrligi ǵalymdar men ǵylymı uıymdardyń, joǵary jáne joǵary oqý ornynan keıingi bilim berý uıymdarynyń qyzmetkerlerin jan-jaqty qoldaý máselelerine nazar aýdarady. Osy jyly mınıstrlik alǵash ret elimizdiń úzdik ǵalymdary úshin syılyqtar taǵaıyndady. Konkýrsqa qatysýǵa ótinimder osy konkýrs úshin arnaıy qurylǵan jáne avtomatty túrde segiz ólshemshart boıynsha baldary bar aqparattyq júıe arqyly qabyldandy», dedi QR BǴM Ǵylym komıtetiniń tóraıymy Janna Qurmanǵalıeva.
Ol bul baıqaýdyń ashyqtyǵy men transparenttiligin qamtamasyz etkenin atap ótti. Ǵylymı jetistikterdi baǵalaý krıterııleri ǵylymı jáne saraptamalyq qaýymdastyqpen birge jasaldy.
«Baıqaýdyń barlyq qatysýshylary ótinim berý kezeńinde óz upaılaryn kóre aldy. Olardy komıssııa qarap,saraptamalyq toptar usynylǵan qujattardyń bekitilgen krıterıılerge sáıkestigin seksııalarda tekserdi», dep qosty Janna Qurmanǵalıeva.
Komıssııa men saraptamalyq toptardyń quramynda jetekshi ǵalymdar, táýelsiz sarapshylar, memlekettik organdardyń ókilderi, jas ǵalymdar keńesi men jas ǵalymdar alıansynyń músheleri jumys istedi.
