«Qazir búkil álem jahandyq ekonomıkalyq jáne geosaıası daǵdarysty bastan keshirip jatyr. Aýmaly-tókpeli kezeń bárimizden jyldam beıimdelýdi qajet etedi. Ýkraına-Reseı qaqtyǵysy men odan keıingi geosaıası teketires, Eýropa terrıtorııasyndaǵy gýmanıtarlyq kataklızmder qazirdiń ózinde dollardyń ósýine, logıstıkalyq dálizderdi qaıta qurylymdaýǵa, energııa tasymaldaýshylardyń rólin qaıta qaraýǵa alyp keldi. Reseıge qoldanylǵan qatań sanksııalar bizdiń elge de tikeleı áser etip jatyr. О́kinishke qaraı, qaqtyǵystyń saldary halyqtyń tabysynyń tómendeýine ákelip soǵady», dedi Adal partııasynyń hatshysy Eldar Jumaǵazıev.
Onyń atap ótýinshe, syrtqy saıasattaǵy osyndaı qaýip-qaterdiń kezinde, keı máselelerge qatysty pikir qaıshylyǵyn qoıyp, «bir jaǵadan bas, bir jeńnen qol shyǵaryp», birge qadam jasaıtyn kezeń týdy. Dál qazir, tirliktiń kúshi de, bereke kózi de — birlikte.
«Adal partııasynyń búgingi kúnge deıingi tyń ıdeıalary men zamanaýı tehnologııalyq kózqarastary Prezıdentimizge salmaqty qoldaý bola alady dep esepteımiz. Kez kelgen ózgeriste sabyrly qalpymen salmaqty sheshim qabyldaıtyn Qasym-Jomart Toqaevtyń jumys stıli bizge unaıdy. Ol qazir ádiletti memleket qurýdy kózdep otyr. Memleket basshysynyń búgingi Qazaqstan halqyna Joldaýy aıasynda aıtqan saıası reformalary sonyń taǵy bir dáleli. Biraq bul aıtylǵan reformalar qalaı júzege asyrylady? Másele osynda. Ol úshin búkil qazaq qoǵamy birigýi qajet. Prezıdent reformalarynyń jergilikti jerde tıisti deńgeıde iske asyrylmaı qalý qaýpi joǵary. Qasym-Jomart Kemeluly aıtqan «Dostarǵa – bárin, qalǵanyna zań boıynsha» degen qaǵıdamen kelgen qoǵamnyń ótkenin umytpaýymyz kerek. Sol úshin, biz, adaldyqtar Jańa Qazaqstandy qurýǵa belsendi qatysyp, elimizdegi oń ózgeriske úles qosqymyz keledi. Partııalastarymyzben aqyldasa kele, búgin Adal-dyń Saıası keńesinde prezıdenttik Amanat partııasyna qosylý týraly biraýyzdan sheshim qabyldadyq. Partııa janashyrlaryna aıtarymyz, osy ýaqytqa deıin halyqtyń tabysyn arttyrý, ár aýyldyń mamandaný kartasyn ázirleý, ákimderdi ádistemelik qoldaý jáne basqa da partııa músheleriniń aldynda alǵan mindettemelerimizdi tolyq oryndaımyz. Oǵan kúmán bolmasyn. Bılik partııasymen birikkennen keıin bastamalarymyz tyń serpin alyp, halyq ıgiligin kóredi dep senemiz. Bizdiń sheshimimizge ózge de áriptesterimiz ben partııalastarymyz, partııa janashyrlary qoldaý bildiredi dep úmittenemiz! «Amanat»-pen birge alar asýymyz alda!», dedi ol.
