Otandyq aqparat keńistiginde teleradıoarnalar janynan qurylǵan tuńǵysh respýblıkalyq medıamektep 2021 jylǵy qarasha aıynda jumysyn bastady. Jeti aı merzim aralyǵynda medıamektepte qazaqstandyq joǵary oqý oryndarynyń jýrnalıstıka, kıno jáne televızııa, rejıssýra fakýltetiniń 30 stýdenti aqysyz negizde praktıkalyq kýrstardan ótti.
Is-sharada «Qazaqstan» respýblıkalyq teleradıokorporasııasy» AQ-nyń qurylymdaryna qyzmetke jáne kadrlyq rezervine qabyldanǵan medıamektep túlekteriniń esimderi atalady. Medıa mekteptiń 7 úzdik túlegi eńbek jolyn korporasııaǵa qarasty Qazaqstan Ulttyq telearnasy jáne Abai TV telearnasynan bastaıdy.
«Otandyq basqa da memlekettik buqaralyq aqparat quraldary salaǵa qosylatyn jas mamandardy praktıkalyq turǵydan shyńdap, tájirıbeden ótkizý jáne kadrlyq rezervke engizý tájirıbesin qolǵa ala bastaýǵa tıis. Bul – kúnde ózgeriske ushyrap jatqan medıa salasy úshin mańyzdy. Osy rette «Qazaqstan» teleradıokorporasııasynyń taǵy bir jobasy – Balapan arnasynyń janynan qurylǵan erekshe balalarǵa arnalǵan anımasııa mektebi de úzdik mysal», dedi mınıstr A.Omarov.
L.N.Gýmılev atyndaǵy EUÝ stýdentteri Gúlzada Abylqaıyrova, Sandýǵash Maralbaı, Álııa Túgelbaı, Madına Qamzına, Ajar Álimhan, Aına Alpysbaı, E.Bóketov atyndaǵy Qaraǵandy memlekettik ýnıversıtetiniń stýdenti Aıbota Erbolat jumysqa qabyldansa, L.N.Gýmılev atyndaǵy EUÝ stýdentteri Aımereke Aıtbaı men Ańsaǵan Ermek, Qazaq ulttyq óner ýnıversıtetiniń stýdenti Qýanysh О́mirbek, Astana IT ýnıversıtetiniń stýdenti Bekzat Berdibek kadrlyq rezervke engizildi.
«Maqsatymyz – tájirıbemen, bilimmen bólisý, qara shańyraqtaǵy kadrlar sabaqtastyǵyn jalǵastyrý. Osy rette «Qazaqstan» teleradıokorporasııasynyń televızııa mamandaryna arnalǵan medıamektebiniń jumysy turaqty túrde jalǵasatynyn habarlaımyz. Iri medıaqurylym retinde eńbekke endi aralasatyn jas mamandarǵa qoldaý kórsetýge daıynbyz», dedi basqarma tóraǵasy L.Tanysbaı.
