«Antıkontrafakt» forýmy ótpek

VII Astana ekonomıkalyq forýmy aıasynda Qazaqstan Respýblıkasy Ádilet mınıstrliginiń uıymdastyrýymen 2014 jylǵy 21 mamyrda «Antıkontrafakt» forýmy ótkiziledi. «Antıkontrafakt» forýmy, bul – kontrafaktili jasandy ónimmen kúres, zııatkerlik menshik nysandaryna quqyqtardy qorǵaý jáne taýarlar men kórsetiletin qyzmetterdiń órkenıetti naryǵyn qalyptastyrý salasynda bılik, bıznes, ǵylym ókilderiniń, quqyq ıelenýshilerdiń, óndirýshilerdiń, avtorlar men jurtshylyqtyń syndarly suhbat qurýyna arnalǵan halyqaralyq alań. Forýmnyń basty taqyryby kontrafaktili, burmalanǵan jáne sapasyz ónimder aınalymyna qarsy kúres jáne ony uıymdastyrýǵa baılanysty máseleler tóńireginde bolady. «Antıkontrafakt» fo­rý­mynyń aıasynda bes sessııa ót­ki­ziledi dep josparlanýda. Birinshi sessııa Keden odaǵy sheńberinde zııatkerlik menshik salasyndaǵy zańnamalardy úı­lestirý máselelerine arnalady. Ekinshi sessııada azyq-túlik, farmasevtıkalyq qaýipsizdik jáne balalar taýarlarynyń qaýipsizdigi jaıly máseleler qarastyrylady. Keleńsiz qubylystardyń biri – pırattyq, búgingi kúni mýzykalyq aýdıo jáne beıne ónimderde keńinen taralyp otyr. «Internet jelisinde zııatkerlik menshik quqyqtaryn qamtamasyz etý» atty úshinshi sessııada osy taqyryp talqylanatyn bolady. Keden odaǵyna múshe memleketterdiń BEK aýmaǵynda kontrafaktili jáne jalǵan ónimniń óndirilýi men taratylýyna qarsy is-áreket boıynsha ózara is-qımylynyń strategııasyn jasap shyǵý qajettiligi jóninde tórtinshi sessııada aıtylady. Sonymen qatar, arnaıy mamandar forým barysynda zııatkerlik menshik quqyqtaryn qamtamasyz etý – josyqsyz básekeden qorǵaý máselelerin talqylaıdy. «Antıkontrafakt» forýmynyń spıkerleri men qatysýshylary Qazaqstan Respýblıkasy, Reseı Federasııasy, Belarýs Res­pýblıkasy úkimetteriniń; Dúnıe­júzilik zııatkerlik menshik uıy­mynyń (DZMU); Eýrazııalyq ekonomıkalyq komıssııanyń (EEK); Dúnıejúzilik keden uıy­mynyń (WCO); Dúnıejúzilik densaýlyq saqtaý uıymynyń; Interpoldyń; Halyqaralyq taýar tańbalary qaýymdastyǵynyń (INTA); Halyqaralyq fonogrammalar óndirýshileri fede­ra­sııasynyń (IFPI); Afrıka zııat­kerlik menshik uıymynyń, TMD elderi men alys shetelderdiń mem­lekettik organdarynyń, qoǵam­dyq uıymdardyń, quqyq ıele­nýshilerdiń, JOO-lardyń ókilderi jáne basqa da múddeli tulǵalar bolyp tabylady. «Egemen-aqparat».