Qaıyrymdylyq is-sharasyna elorda etnomádenı birlestikteriniń ókilderi, QHA Kásipkerler qaýymdastyǵy, sondaı-aq Nazarbaev ýnıversıteti Joǵary bıznes mektebi túlekteriniń qaýymdastyǵy, «Alumni of Nazarbayev University School of business» KEU, mesenattar, bıznesmender jáne qala turǵyndary belsendi qatysty.
Nur-Sultan qalasy ishki saıasat basqarmasynyń basshysy Dáýren Babamuratovtyń aıtýynsha, elordadaǵy qaıyrymdylyq shtaby ótken jeksenbiden bastap táýlik boıy jumys istep keledi. «Tilsiz jaýdan zardap shekkenderge alǵashqy kómek kórsettik. Apat týraly bilgen boıda Nur-Sultan qalasynan 8 júk kóligin jiberdik. Qaıyrymdylyq aksııamyz munymen aıaqtalmaıdy, bizge múmkindiginshe qurylys materıaldary nemese tıisti qaıyrymdylyq shottarǵa aqshalaı kómek qajet degen aqparattar kelip tústi. Bizdiń qamqorlyǵymyz ben qoldaýymyz qostanaılyqtarǵa aýyr zardaptardan aıyǵýǵa kómektesedi dep úmittenemiz», dedi Dáýren Babamuratov.
«Qostanaıdaǵy apat eshkimdi beıjaı qaldyrǵan joq. Biz bárimiz qostanaılyqtar úshin alańdap otyrmyz. Árqaısysymyzdyń azamattyq paryzymyz – órtten zardap shekkenderge kómek qolyn sozyp, kómektesý jáne osy jaǵdaıdy moraldyq turǵydan jeńý. Qazaqstandyqtar un, qant, makaron, kúrish, kúnbaǵys maıy, aýyz sý, matrastar, jastyqtar, sondaı-aq balalarǵa qajetti zattardy: kúrtesheler, jaıalyqtar men aıaqkıimderdi alyp berýde. Biz halqymyzdyń basyna túsken qıyndyqty osylaı birlikpen eńseremiz», dep atap ótti QHA múshesi, «Dýstlık» ózbekter qaýymdastyǵy tóraǵasynyń orynbasary Hasan Sháripov.
Aıta ketken jón, elordalyq Qazaqstan halqy Assambleıasyna jiberilgen qaıyrymdylyq kómektiń jalpy somasy 14 mln teńgeni qurady.
