«Báıterek» ulttyq basqarýshy holdınginiń basqarma tóraǵasy Qanat Sharlapaevtyń aıtýynsha, menshik quqyǵyna kóshý boıynsha tranzaksııa 1 qyrkúıekte jabylǵan. Endi, mindetti túrde rebrendıng bolady.
«Jańa bank Bereke Bank dep atalady. Bul qazaqsha jaqsy sóz – bir-birimizge tileımiz. Menińshe, bul qarjy ınstıtýtynyń osyǵan deıingi atqarǵan qundylyqtary men talpynysyna saı keledi jáne keleshekte de jalǵasady dep úmittenemiz», deıdi Q.Sharlapaev.
Bul týraly Qazaqstan qor bırjasynyń (KASE) resmı saıtynda da jarııalandy. Sondaı-aq dırektorlar keńesiniń músheleri – Natalıa Avdeenko, Tımýr Kozınsev jáne Mıhaıl Moshıashvılıdiń ókilettikteri merziminen buryn toqtatylǵan. Olardyń ornyna úsh jańa adam keldi – Qanat Sharlapaev, Ádil Muhamedjanov jáne Ersaıyn Hamıtov. Úsheýi de «Báıterek» ókilderi. Dırektorlar keńesiniń burynǵy múshelerinen tek Asqar Elemesov pen Maǵjan Mádıev ǵana qaldy.
Eske salaıyq, bıyl 2 qyrkúıekte «Báıterek» UBH men Sberbank toby qazaqstandyq enshiles banktiń 100 paıyz aksııa paketin satyp alý-satý mámilesin aıaqtaǵan edi.
«Mámile ózara qolaıly sharttarǵa negizdeldi jáne retteýshiden qajetti maquldaýlardy aldy. Bank klıentter aldyndaǵy óziniń mindettemesin oryndaýdy jalǵastyrady jáne bank ónimderi boıynsha barlyq shart qazirgi klıentter úshin ózgerissiz qalady. «Báıterek» holdıngi elimizdiń qarjy júıesi úshin banktiń úlken mańyzǵa ıe ekenin baǵalaıdy. «Sberbank Qazaqstandaǵy» ózindik zamanaýı ınfraqurylym men tehnologııa qyzmetti jalǵastyrýǵa jáne ekonomıkanyń naqty sektoryn qarjylandyrýǵa múmkindik beredi. Mámile arqyly bank belsendi operasııalar kólemin, depozıt tartýdy jáne tólemder júrgizýdi, sondaı-aq halyq pen bıznes úshin ónimder men qyzmetterdi damytýdy tolyq kólemde qalpyna keltiredi», dep habarlady «Báıterek» UBH.
Q.Sharlapaevtyń aıtýynsha, sanksııalar alynǵannan keıin Bereke Bank sheteldik ınvestorǵa satylýy, satý prosesiniń 18 aıǵa sozylýy múmkin.
«Holdıngtiń basty mindeti – burynǵy «Sberbank Qazaqstannyń» qyzmetin qalpyna keltirý, sosyn satý. Jumys rejimi qalypqa kelýi úshin qajetti jaǵdaı jasalady. Munyń tek meniń sheshimim emes ekeni túsinikti. Biraq qarjy naryǵyndaǵy oıynshylar arasynda úlken báseke týdyrý úshin sheteldik ınvestorǵa berýdi durys dep sanaımyn. Birinshi kezekte bank SDN tiziminen shyǵarylýy kerek. Bul tizimde AQSh azamattaryna bıznes júrgizýge tyıym salynǵan adamdar men uıymdar bar. «Odan keıin halyqaralyq tólem júıelerimen, reıtıngtik agenttiktermen, basqa da iri kontragenttermen qarym-qatynas jasaý áldeqaıda múmkin bolady», deıdi «Báıterek» basshysy.
2022 jyldyń 11 shildesinde AQSh Qarjy mınıstrliginiń sheteldik aktıvterdi baqylaý basqarmasy (OFAC) «Sberbanktiń» mámile jasaý merzimin 2022 jyldyń 12 shildesinen 2022 jyldyń 11 qazanyna deıin uzartatyn lısenzııany jarııalaǵan edi.
Osyǵan deıin Qarjy naryǵyn retteý jáne damytý agenttiginiń tóraǵasy Mádına Ábilqasymova bankti tolyqtaı ornyqty jáne tólem qabiletine ıe dep málimdedi. «Bankke qosymsha kapıtaldandyrý berilmeıdi, jaǵdaıy ornyqty. Kapıtaly jetkilikti bolǵandyqtan, tólem qabileti bar. Onyń ótimdi aktıvteri jáne qaryz portfeliniń sapasy óte joǵary. Bankti satýdyń negizgi sebebi – Sberbankpen operasııa jasaýǵa múmkindik beretin bas lısenzııanyń kúshi 12 qazanda bitedi. 12 qazannan keıin bank SDN tizimine enedi. Bul tizimge engen uıymdardyń operasııa júrgizý múmkindikteri shekteledi. Osyǵan baılanysty bankti SDN tiziminen shyǵarý úshin reseılik aksıonerler bankti satýǵa sheshim qabyldady», dedi M.Ábilqasymova.
Batys sanksııasyna ushyraǵan taǵy bir enshiles bank – «Alfa-Banktiń» ataýy Eco Center Bank bolyp aýysqany jáne «Bank SentrKredıttiń» satyp alǵany belgili. Jaqynda Eco Center Bank óz qyzmetiniń tolyqtaı toqtatylǵanyn málimdedi. Mundaı sheshim bank aksıonerleriniń jınalysynda qabyldanǵan.
«Eco Center Bank» AQ-nyń («Bank SentrKredıt» AQ EB) quqyqtyq mırasqory retinde «Bank SentrKredıt» AQ, «Eco Center Bank» AQ-nyń («Bank SentrKredıt» AQ EB) barlyq múlkin, quqyqtary men mindetterin, sondaı-aq onyń barlyq kredıtoryna qatysty barlyq quqyqtary men mindettemelerin berý týraly ótkizý aktisi bekitilsin. «Bank SentrKredıt» AQ jáne «Eco Center Bank» AQ («Bank SentrKredıt» AQ EB) «Eco Center Bank» AQ («Bank SentrKredıt» AQ-nyń EB) «Bank SentrKredıt» AQ qosylýy nysanynda erikti túrde qaıta uıymdastyrylýy sheńberinde qaıta qurylýy múmkin», delingen qor bırjasynyń habarlamasynda.
Sanksııa salynǵan taǵy bir enshiles bank bar, bul – «VTB Qazaqstan». Biraq salynǵan sanksııaǵa qaramastan, atalǵan qarjy ınstıtýty Qazaqstan naryǵyndaǵy jumysyn jalǵastyryp jatyr. Buǵan deıin Reseıdegi bas VTB Qazaqstandaǵy enshiles kompanııasyna qosymsha kapıtaldandyrý jasaǵan edi.
