Qarjy • 26 Qyrkúıek, 2022

Keshiktirilgen nesıe qaryzy qomaqty

78 ret kórsetildi

Zaım sapasyna qarap banktiń deńgeıin tanýǵa bolady. Árıne, bankter tek zaım berýmen aınalyspaıdy. Olar depozıt jınaıdy. Qor naryǵyna shyǵady. Basqa da túrli bank ónimderin usynýmen aınalysady. Biraq aınalyp kelgende báribir tek kredıt berýmen ǵana óz tabysyn eseleıdi, soǵan sáıkes óziniń naryqtaǵy ornyn aıqyndaı túsedi. 2022 jyldyń 1 tamyzyndaǵy jaǵdaı boıynsha ekinshi deńgeıli bankterdiń jıyntyq qaryz portfelindegi keshiktirilgen tólem kólemi 1,53 trln teńgege jetken. Bul 2021 jyldyń kórsetkishinen 19,9 paıyzǵa artyq.

Úzdik ondyqqa kiretin bankter ishinde tek úsheýi ǵana keshiktirilgen tólem kólemin bir jylda azaıta alǵan. Tólenbeı qalatyn qaryzdarmen kúres boıynsha eń úzdik kórsetkish Bank RBK-ǵa tıesili: bir jylda nashar qaryzdar deńgeıin 48 paıyzǵa, 34,8 mlrd teńgege deıin azaıtqan. Al bir aı ishinde qarjy ınstıtýty «nashar» kórsetkishti 6,8 paıyzǵa qysqartqan. Ekinshi oryndaǵy «Bank SentrKredıtte» keshiktirilgen zaım kólemi 4,8 paıyzǵa, 93 mlrd teńgege deıin qysqarǵan. Bul – banktiń qaryz portfeliniń 5,5 paıyzy. Úshtikti ForteBank túıindeıdi: mınýs 3,2 paıyz, 80,5 mlrd teńgege deıin. Keshiktirilip jatqan zaımdar qaryz portfeliniń 7,4 paıyzyn enshileıdi deıdi Ranking óz zertteýinde.

Qalǵan 7 bankte keshiktirilgen tólem­ge ıe zaım kólemi ósip ketken. Tó­lemder boıynsha eń qaýipti keshik­ti­rý bolyp sanalatyn – tólenbeı turǵanyna 90 kúnnen asqan (NPL 90+) ýly zaımdar úlesi bir jylda 1,1 paıyzǵa ósti. Bul – 828 mlrd teńge.

Jyldyq dınamıkada iri bankter arasynan tek 4 bank óz kórsetkishterin jaqsarta alǵan. NPL 90+ kórsetkishin qysqartý boıynsha taǵy da Bank RBK kósh basynda: bul bank 12 aıda qaýipti qaryz kólemin 66,2 paıyzǵa, 17,8 mlrd teńgege deıin azaıtqan. Al jalpy qaryz portfeliniń kólemi – 778,2 mlrd teńge. Ekinshi orynda – «Qazaqstan Halyq Banki» qarjy ınstıtýty bir jyl ishinde NPL 90+ kórsetkishin 21,3 paıyzǵa qysqartsa, úshinshi oryndaǵy «Bank SentrKredıt» 20,4 paıyzǵa deıin tómendete alǵan. ForteBank kórsetkishi aldyńǵy úsh ınstıtýttaı joǵary emes, tek 2 paıyzǵa azaıtypty. Al ózge bankterdiń barlyǵy derlik ýly zaımdar úlesin azaıta almaǵan.

«Eske salyp óteıik, Bank RBK men Halyk Bank portfel sapasy boıynsha úzdik bankterdiń úshtigine kiredi. Bank RBK-da NPL 90+ búkil zaım kóleminiń 2,3 paıyzyn qurasa, bul kórsetkish Halyk Bank-te – 2,1 paıyz. Sektordaǵy portfel sapasy táýir úshinshi bank – memlekettik «Otbasy banki». Olardaǵy NPL 90+ portfeldiń 0,1 paıyzyn alady», dep málimdeıdi sarapshylar.

Jalpy alǵanda, tólemniń keshik­ti­rilýine qaramastan jalpy qaryz port­felindegi keshiktirilgen zaım úlesi sektor boıynsha 7,1 paıyzǵa tómen­degen (byltyr 7,5 paıyz bolǵan). Bes jyl burynǵymen salystyrǵanda – 18,9, paıyzǵa, on jyl burynǵymen sa­lys­tyrǵanda 35,3 paıyzǵa azaıypty.

Eldegi búkil ekinshi deńgeıli bank­ter­degi jıyntyq qaryz portfeliniń kólemi 21,55 trln teńgege jetti. Bul – 2021 jylǵy jıyntyq portfel so­ma­synan 26,3 paıyzǵa joǵary kór­setkish.

Sońǵy jańalyqtar

Senatorlar ózekti máselelerdi talqylady

Parlament • Búgin, 14:03

ÁCh 1/8 fınalynda kimder oınaıdy?

Fýtbol • Búgin, 12:40

Bir táýlikte 173 adam koronavırýs juqtyrǵan

Koronavırýs • Búgin, 11:02

Uqsas jańalyqtar