Salyq zańnamasyna sáıkes aldaǵy salyq somalary boıynsha habarlamalar osy jyldyń shilde aıynda menshik ıelerine jiberilgen bolatyn. Budan basqa, «Kaspıı bank» AQ mobıldi qosymshasyn paıdalanýshylaryna PUSH-habarlamalar túrinde jiberildi. 2021 jyl úshin múlik salyǵy 3,8 mln salyq tóleýshi boıynsha jalpy somasy 14,3 mlrd teńgege eseptelgen. Degenmen búginde shamamen 1,7 mln menshik ıesi «2021 jyl» kezeńine 5,7 mlrd teńge somasyna múlik salyǵyn tólemepti. Bul týraly Qarjy mınıstrligi habarlady.
Tólenbegen salyq somalary boıynsha Almaty qalasynyń turǵyndary kósh bastap tur (1 379 mln teńge), ekinshi orynda – Shymkent qalasy (1 194 mln teńge), antıreıtıngtiń úshtiginde – Astana qalasy (1 094 mln teńge).
«Osyǵan baılanysty, Memlekettik kirister komıteti 2022 jyldyń 2 qazanynan bastap jeke tulǵalardyń salyq bereshegi týraly habarlamalardy boryshkerlerge jiberetinin eske salady. 1 aılyq eseptik kórsetkishten astam bereshek somalary boıynsha habarlama tabys etilgen soń otyz jumys kúninen keıin bereshekti májbúrlep óndirip alý týraly salyq buıryǵy jiberiledi. Bul salyq buıryǵy 5 jumys kúni ótkennen keıin jeke sot oryndaýshylaryna májbúrlep óndirip alý úshin beriledi», delingen vedomstvo habarlamasynda.
Bul rette jeke sot oryndaýshylary bereshek somasynan basqa shottarǵa tyıym salý jáne shyǵýǵa shekteý qoıýdan týyndaǵan qolaısyzdyqtar týraly aıtpaǵanda, salyq bereshegi somasynyń 25 paıyzyna deıingi mólsherde qosymsha tólemdi óndirip alady. Sondyqtan artyq shyǵyndar men problemalardy boldyrmaý úshin múlik salyǵyn ýaqtyly tólegen abzal.
Salyqty e-Salyq Azamat jáne ekinshi deńgeıdegi bankterdiń mobıldi qosymshalary, «Elektrondyq úkimet» portaly arqyly, ekinshi deńgeıdegi bankterdiń bólimshelerindegi nemese tólem termınaldaryndaǵy qolma-qol aqsha qarajatymen, sondaı-aq bankomattar men tólem termınaldaryndaǵy bank kartalary arqyly tóleýge bolady.
