Elimizde shaǵyn jáne orta bıznesti damytý kerek dep urandata aıtylady. Tipti bul saladaǵy kásiporyn sany da kóbeıip jatyr. Biraq san kóbeıgennen sapa artyp ketken joq. ShOB-tyń aıaǵyna oratylyp jatqan kedergi kóp. 2022 jyly tamyzdyń sońyndaǵy derek boıynsha 178,7 myń shaǵyn belsendi kásiporyn bar. Byltyrǵy kórsetkishten 9,7 paıyzǵa kóp. Al jeke kásipkerlikti tirkegender sany 24,8 paıyzǵa artyp, 1 mln-nan asqan. Biraq ishki jalpy ónimdegi shaǵyn kásipkerlik úlesi 26,8 paıyzdy, shaǵyn jáne orta bıznes úlesi 33,5 paıyzdy quraıdy.
Ranking málimeti boıynsha, kórshi О́zbekstanda ShOB-tyń ishki jalpy ónimdegi úlesi 50 paıyzdan asady. Damyǵan elderde tipti 50 men 60-tyń ar jaǵynda. Árıne, olarmen salystyrar bolsaq, bizdiń jaǵdaı onsha emes. Ári osy 30 paıyzdyń aınalasynda úıelep qalǵanymyzǵa da biraz jyl boldy.
«Shaǵyn jáne orta bıznestiń damýyn tejep turǵan mańyzdy faktor – jetkilikti deńgeıde qarjylandyrýdyń bolmaýy. Mysaly, bankter negizinen iri megapolısterdegi shaǵyn bıznesterge nesıe beredi. Almaty men Astananyń jalpy úlesi 68 paıyzdy quraıdy. Sáıkesinshe, ózge qalalardaǵy órken jaıǵysy keletin shaǵyn jáne orta kásipkerlik sýbektileriniń bank zaımyna qoly jete bermeıdi. Al alys eldi mekenderde tirshilik etip jatqan bıznestiń ahýaly tipti qıyn», dep málim etedi Ranking.
Mundaıda mıkroqarjy uıymdary aldyńǵy qatarǵa shyǵady. Bank murnyn shúıirgen keńistikke MQU-nyń meıirimi tússe, kánekeı. Sektordaǵy lıder sanalatyn KMF-tiń búkil óńirde, onyń ishinde alys aýdandarda 114 bólimshesi bar eken. Bul MQU-nyń klıent bazasynyń 68 paıyzyn aýyl turǵyndary alyp otyr. Sondaı-aq KMF qaryz portfeliniń tolymdylyǵy boıynsha da lıder: 191,3 mlrd teńge. Kompanııa ShOB sýbektileri men mıkrokásipkerlerge – mıkroqarjylandyrýdy, tutynýshylyq jáne toptyq mıkrokredıtteýdi, avtokredıtteýdi jáne EQDB-nyń GEFF «jasyl» ekonomıkany qarjylandyrý baǵdarlamasy sheńberinde «jasyl» qarjylandyrýdy usynady. Ol mıkrokredıt somasynyń 10 paıyzyna deıin keshbek alý múmkindigimen tıimdi jáne energııa únemdeıtin jabdyqtardy satyp alýǵa baǵyttalǵan. Energııany únemdeıtin tehnologııanyń kómegimen turǵyn úıdi nemese bıznesti jańartýǵa bolady. Ekinshi orynda – qaryz portfeliniń somasy 124,5 mlrd teńgeni quraıtyn MyCar Finance. Úshinshi orynda «Toıota Faınanshl Servısez Kazahstan» (123,1 mlrd teńge). Sońǵy eki kompanııanyń tikeleı avtonesıeleý segmentinde belsendi jumys isteıtinin aıta ketken abzal.
Ulttyq ekonomıka mınıstri Álibek Qýantyrov usynǵan derek boıynsha 2012 jyldan beri ShOB shyǵaratyn ónim kólemi 42,8 trln teńgege jetken. IJО́ 82,2 trln teńgeni qurap, jumys istep turǵan ShOB-tyń jalpy sany 1,4 mln sýbektige jetken. ShOB-ta jumyspen qamtylǵandardyń jalpy sany – 3,5 mln. Al sektordy nesıeleý somasy 5,7 trln teńgeden asty.
«Sońǵy 10 jylda memlekettik qoldaý sharalaryn alýshylardyń ónim shyǵarý kólemi 53 trln teńgeni qurady. Kásipkerlikti damytý jónindegi ulttyq joba sheńberinde memlekettik qoldaý sharalaryn alýshylar shamamen 118 myń adamdy jumyspen qamtydy», deıdi Á.Qýantyrov.
Jalpy, ulttyq joba aıasynda kredıtter boıynsha sýbsıdııalaý jáne kepildik berý; jańa bıznes-ıdeıalardy iske asyrý úshin granttar berý; qajetti ınfraqurylymmen qamtamasyz etý; ShOB úshin aqparattyq-konsýltasııalyq qyzmetter kórsetý josparlanyp otyr.
