Sarapshylar dereginshe, ekoqylmys, ásirese damýshy elderde órship tur. Sonymen qatar qorshaǵan ortaǵa zııan keltiretin qylmystarǵa reaksııa kóbine, sırek kezdesetin janýarlardy óltirgennen keıin nemese ósimdikter joıylǵannan keıin paıda bolady.
«Mysaly, bıyl tamyzda Astananyń úsh turǵyny 43 kılo aqbóken múıizin satqany úshin 8 jylǵa bas bostandyǵynan aıyryldy. Olardyń qylmysynan memleketke 312 mln teńge zalal kelgen. 2017 jyldan 2022 jyldyń qyrkúıegine deıin elimizde jyl saıyn 1,1 myńǵa jýyq ekologııalyq quqyq buzýshylyq tirkelgen. Jyl saıyn qylmys sany azaıyp jatqanyna qaramastan, qarjylyq zııan mólsheri ósip jatyr. Byltyr ekologııalyq qylmys saldarynan 5,3 mlrd teńge qarjylyq shyǵyn kelgen. Bul 2017 jyldan beri tirkelip otyrǵan rekordty soma», dep jazdy Ranking.
Ekologııalyq qylmystyń zalaly áste jeńil emes. Tabıǵatqa keltirilgen zııan saldarynan tutas ekojúıe buzylady, ekologııalyq apat paıda bola bastaıdy, tabıǵat júıesi qurdymǵa ketip, túrli aýrýlardyń týý táýekeli artady. Jalpy, 2017 jyldan beri ekoqylmys saldarynan jyl saıyn 3,5 mlrd teńge kóleminde shyǵyn tirkeldi. Alaıda kináliler shyǵyn somasyn óteýge asyǵatyn emes. Keıingi bes jylda jyl saıyn tek 676,5 mln teńge ótelgen. Bul búkil shyǵyn somasynyń 19 paıyzy ǵana.
