Qazaqtyń Táken Álimqulovy: «Marhabat – tuńǵysh áńgimeler jınaǵymen-aq tanylyp úlgergen jazýshy... «Ońtústik Qazaqstan» gazetinde isteı júrip, neǵurlym naqtylyqqa, qysqalyqqa mashyqtanǵan. Kórkem týyndylary óz tabıǵatynan bastaý alady. Tárjimashyldyǵy da tánti etedi», depti. Osy bir pikirge «Aqtolǵaı» kitabyn oqyp bolyp kelisesiz, bas ızeısiz. Tipti birshama ýaqytqa deıin Marhabatsha oılanyp, Marhabatsha qysqa da nusqa, ázil shyny aralas sóılep júresiz. Jazýshynyń aýyl mádenıetin sezinýi, aýyl adamdarynyń túri men túsin órnekteýi tipten bólek. Kúldire otyryp jylatý, jylata otyryp jubatý qalamgerdiń degdar talantynyń bir kórinisi. Jınaqtyń «Qaragerler» bóliminen mysal keltirelik: «Jýaly asyp, Kósegeniń kók jonyn kezip, kókpar izdegen. Bılikóldegi bólelerin qaırapty. Balyqtysý boıyndaǵy qystaýlaryna birjolata qonystanyp qalǵan qarashekpendilerge tisin qaırapty. Qaıran qaıda?! Bılikólińiz búk túsken. Bas kóterer bir jan joq. Jer shuqylaıdy bári». Osy bir sóılemderden eliktirme sheberlik, kúrdeli sóz qoldanys baıqalady. Beınebir Asqar Súleımenov, Táken Álimqulovtaı kósip-kósip, totııayn tilimen dittegen oıyn oqyrman sanasynyń tuǵyryna qondyrady. Mádenıeti bólek, minezi ózge. Dýlat Isabekov: «Marhabattyń basqalardan artyqshylyǵy – ol óz keıipkerleriniń qalyń ortasynan alystaǵan emes», deıdi. Rasynda, keıipkerlermen birge ómir súrý, qaınaǵan ómir «domnasynyń» ishinde ár adamnyń janyna úńilý, syry men synyna sát saıyn kezigip otyrý – jazýshy shyǵarmalarynyń shynaıylyǵyn arttyryp, talantyn shynyqtyra túsken.
«Aqtolǵaı» jınaǵynda «Qurylysbattaǵy qorlyqtar» atty bólim ushyrasady. Jazýshy áskerı jyldarynda kórgen qıynshylyqtary men adam janynyń kúızelgen, kúńirengen keıpin sondaǵy túrli oılar men sezimder arqyly jetkizgen. Sibirde júrip shynyǵyp, katorgada bolǵan Dostoevskıı sekildi turmys taýqymetin tartqan. Sirá, shyn jazýshy úshin ómir qoınaýyna ený, mehnaty men jaryǵyn qatar kórý úlken mazmun qalyptastyrýǵa sep bolmaq. «Jazýshy bolý úshin baqytsyz balalyq shaq kerek» degen sózdiń túbiri tereń. Kitapta jazýshy ózi týǵan Pisteli aýylynyń aıshyqty kelbetin tanytady. «Surasań bizdiń aýyl Pistelide» degen qalamger Pistelisaıda ósetin taýpistesin (jańǵaq tuqymdas jemis aǵashy), Aqquzar jaqtaǵy dolanaly betkeıin, Bókeıtaýdaǵy kókemaral men kıikotyn tebirene sýretteıdi. Sirá ár jazýshynyń bir jumaq mekeni bar. Tolstoıda Iаsnaıa Polıanada bolsa, Balzakta han saraıyna bergisiz jaldamaly jupyny páteri, Chehovtyń eń ataqty týyndylaryn jazǵan Melıhovasy bar.
Marhabat Baıǵut bolmysy – kópshilik ortada jany azaptalatyn, jalǵyzdyq baǵynda jańa búrlegen oıyn san ret qaıtalap, óz áleminde ǵana tynyshtyq tabatyn parasatty, aıqaıdan alys abzal bolmys. «Aqtolǵaı» jınaǵynda «Dat qazaqtar» dep ultqa dat aıtyp, qoǵamnyń keleńsizdikterine ashynady. Keteýi ketken máselelerdi qyrnap, el bolashaǵyn baǵamdaıdy. Qoryta aıtqanda, «Aqtolǵaı» jınaǵy ózin izdegen ár oqyrman úshin jolbelgi bolýǵa daıar baǵaly dúnıe.
