Alhımık kitaby ózin izdep ólke kezgen jolaýshyǵa taptyrmas gıd. Santıago qoıshynyń belgisiz jaqqa sapar shegýiniń nátıjesinde paıda bolǵan «О́z joly» túsinigi qyzyqty oqıǵalar arqyly san-salaly beınelenedi. Jazýshynyń jeke ómir-taǵdyry da san qıly. Nashaqorlyqqa uryný, jyndyhanaǵa túsý, dinı sektaǵa kirip qara magııamen aınalysý, otbasylyq taýqymet syndy kúrdeli jaıttar Koelonyń tájirbıelik bilimin arttyrdy. Shym-shytyryq ómir aǵystarynda sýısıd jaıly oılarǵa shyrmalǵanymen, avtordyń ómirge qushtarlyǵy arta túsedi. Ol Nıssheniń «jar jaǵalap qulap bara jatqan adamdy qolynan tartyp, aman alyp qalý qajetsiz, ony ári qaraı ıteıarip jiber, óıtkeni ol soǵan laıyq» degen oıyna qarsylyq tanytady. Bul túıindi derbes sabaqtaı kelip: «jar jaǵalap qulaýǵa aınalǵan adamdy bir emes, birneshe ret kezdestirseń de aman alyp qal, biraq oǵan ári qaraı qalaı ómir súrýdi úıretip áýre bolma, ózi sol sanaǵa jetpeı bolmaıdy» deıdi. Rasynda, kisi aqyly ózgege aqyl bolmaıdy. Jaýǵan nóserden keıbir jer kógaraı shalǵynǵa aınalsa, keıbir jer taqyr qalpyn saqtar. Jazýshy birde: «men ózimdi sońyna jetip bolmaıtyn jolmen ketip bara jatqan zııarat etýshimin dep sýretter edim» degen-tin.
«Alhımıkte» jan-jaqty qubylystardan túıilgen, aqylda qordalanǵan fılosofııalyq túıinder kóptep kezigedi. Shynaıylyǵynan ba eken, álde kóńil pernesin tap basatyn ishki aǵyndarǵa ilese ketetindiginen be, árbiri oıǵa qona ketedi. Serpin, kúsh beredi. «О́z taǵdyrynyń júzege asýyna qol jetkizý – adamnyń birden-bir mindeti. Barlyq adamdar jas kezinde-aq óz taǵdyryn biledi... Biraq ýaqyt óte kele jasyryn bir kúsh sol taǵdyrynyń júzege asýy múmkin emestigin dáleldeı bastaıdy. Bul kúsh adamǵa jaqsylyq tilemeıtindeı kórinedi, degenmen, shyn máninde, ol adamǵa óz taǵdyryn qalaı júzege asyrýǵa bolatynyn kórsetip turady. Ol, osyǵan adamnyń rýhy men jigerin daıyndaıdy. Bul ǵalamsharda bir uly aqıqat bar: eger sen shynymen bir nárseni qalasań, oǵan jetesiń, óıtkeni mundaı qalaý Álemniń kókireginde paıda bolady. Naq osy – seniń jerde ne úshin júrgenińdi bildiredi». Jazýshy sózi qashan da ǵaıypqa senýge, bizdiń sanamyzdan tys keńistik baryn dáleldeýge kúsh salady. Osynyń bári kitabı til emes, shyn senim men kúresten týǵan támsil ekeni sezilip turady. «Eń qarańǵy kez tań atýǵa jaqyndaǵanda bolady» deıdi jazýshy. Qudaı taǵalanyń joly úzdiksiz almasyp otyratynyn, eshqashan úmit úzýge bolmaıtynyn eskertedi. Qalyń qardyń astynda qyltıyp shyǵar báısheshek gúldiń ómiri bar. «Bar qupııa qazirgi sátte. Oǵan laıyqty kóńil bólseń – ony jaqsartasyń. Ony jaqsartsań – bolashaqty da jaqsarta alasyń. Sondyqtan bolashaǵym jaqsy bolsyn degen adam naq búgingi sátin qoldan jiberip almasyn. Árbir kún – máńgiliktiń bir bólshegin quraıdy».
Koelo kitaptarynyń álemniń 155 elinde taralyp, 56 tilde 70 mıllıon danamen taralýynyń syry – ishki ómir prosesterinen quıylǵan pálsapalardyń qoıýlyǵynda bolsa kerek. Kabýsnamada aıtylǵandaı, týma aqyl men kásibı aqyl qosylsa ǵana kisige danalyq bitedi. Jazýshy qııalyn kózben kórip, kózin qııandarǵa sýaryp, 40 jasynda tuńǵysh shyǵarmasyn jazypty. Álemdi kezip, jańa adamdarmen syrlasyp, zamandastarynyń dińine úńilipti. Dinı túsinikterdiń qaıshylyǵy jóninde jalǵyz aýyz sózben sheshimtal pikir órbitip: «Barlyq din jaryqqa umtylady, ony qarańǵyǵa súırelep, óz paıdasyna jumsaǵysy keletinder – saıasatshylar» depti.
Shyǵarma sońynda Santıago tanys aǵash túbine, alhımık qaldyrǵan altynǵa jetedi. Munda bir jyldary ózi qoı baqqan shańdaýyt jolyn eske alady. Aǵash túbinen altyn men jaýharǵa toly sandyqshany qazyp, qýanyshqa batady. Santıago «kim óz jolyna erse, ómir soǵan jomarttyq tanytady» degen oıǵa bekıdi. Qazynasynyń onnan bir bóligin eski syǵanǵa aparýdy kózdeıdi. Sońyra súıiktisine oralýǵa múmkindik alady. Alhımık – danalyq oılar jemisimen nyǵyzdalǵan kárzeńke ispetti. Máselen, «jer betinde árbir adam qandaı ispen aınalysqanyna qaramastan álemniń tarıhynda basty ról oınaıdy», «adamnyń tóńiregindegi adamdar ózgerip turmasa, olar adamnyń búkil bolmysyna enip ketedi», «qoılarmen birge júrgen adam onsha jalǵyzsyramaıdy», «bar qupııa qazirgi sátte».
