Armıan tarapy Qazaqstandaǵy saıası jáne áleýmettik-ekonomıkalyq reformalardyń iske asyrylý barysymen, sondaı-aq naýryz aıynda ótken parlamenttik saılaýdyń qorytyndylarymen egjeı-tegjeıli tanystyryldy.
G.Sanosıan Qazaqstan basshylyǵynyń saıasatyn joǵary baǵalap, Erevan men Astana arasyndaǵy ózara tıimdi qarym-qatynastardy damytýǵa daıyn ekenin bildirdi.
Armıan tarapy ekijaqty kóliktik jáne óńiraralyq baılanystardyń belsendi damýyn atap, buǵan 2022 jyly eki el arasyndaǵy taýar aınalymynyń eki eseden astam ósýi dálel ekenin aıtty. G.Sanosıan saýda jáne energetıka sektorlarynda eleýli áleýettiń bar ekendigin jáne Eýrazııalyq ekonomıkalyq odaq sheńberinde múmkindikterdi paıdalanýdyń mańyzdylyǵyn atap ótti.
Áńgimelesý barysynda 2023 jylǵa arnalǵan birlesken is-sharalar kestesi men bıyl 27-28 sáýirde Erevanda ótetin Ekonomıkalyq yntymaqtastyq jónindegi Qazaqstan-Armenııa úkimetaralyq komıssııasynyń kezekti 9-shy otyrysyn ótkizý máseleleri qarastyryldy.
