– Áne-mine bitedimen kele jatyrmyz. Kezegimizdi sarǵaıyp, saǵattap kútemiz. Dárigerge ázer jetkenimizde baza istemeı qalady. Sóıtip júıkemiz juqarýda. Astanadan kóship kelgenime 4 jylǵa jýyqtady. Ol jaqta mundaı qıyndyqty kórmegen edik. Tynys joly aýrýymen esepte turatyn kúıeýimniń dárilerin ala almaımyn. Astanada bar dári aýylda joq degen jaýap aldyq. Almatyǵa jaqyn mańdaǵy aýyldardyń kúıi osy bolsa, shalǵaıdaǵy eldi mekenderdegi medısınany elestetý múmkin emes shyǵar, degen Nazgúl esimdi tórt balanyń anasy jóndeýden ótip jatqan ambýlatorııanyń sıfrlandyrylyp, elektrondy kezektiń jolǵa qoıylýyn kútedi.
Dárigerge kezegin kútken besinshi balaǵa júkti Jarııa Aqjoltaeva mekemeniń qolaısyzdyǵymen qosa, terapevt, gınekologten basqa turǵyndarǵa asa qajet nevropotolog, pýlmanolog, kóz, tis dárigerleriniń joqtyǵyn, olarǵa qaralý úshin qaladaǵy aqyly emhanalarǵa sabylatyndaryna renishin bildirdi.
– Aınalaıyn-aý, myna jerde sıstema alyp biz jatamyz, anaý buryshty kólegeılep qoıyp, áıelderdi tekserip jatady. Kóz aldymyzda bala-shaǵa men naýqastarǵa ýkol salyp, ekpe jumystaryn jasaıdy. Syrt kıimniń úıilip, aıaq kıimniń tizilip turysy anaý. Eshqandaı sanıtarlyq norma saqtalmaǵan. Emshara, tańý jumystary sterıldi kabınette jasalýy kerek emes pe? Aýasy tar, adam aınalmaıtyn aıadaı jerde búkil jumys atqarylady. Bul ne masqara? Ortalyqtan jetý de ońaı emes. Taıaǵymyzdy súıretip, úlken joldan ótemiz. Basynda eki aıǵa degendi estip edik, ekinshi jylǵa ketip barady. Mundaǵy medısına mamandaryna esh ókpemiz joq. Olar osyndaı qıyndyqqa qaramastan óz isterin múltiksiz atqaryp júr. Bári tájirıbeli, meıirimdi, qaıyrymdy. Tek ózimizdiń ǵımaratqa tezirek kóshirse degen tilegimiz bar, dedi 75 jastaǵy em alýshy aýyl turǵyny Qyzjibek Talǵarbaıqyzy.
Toıhana ǵımaratyna 2021 jyldyń qazan aıynda kóship kelgen medısınalyq mekemede 8 700 adam tirkeýde tursa, olarǵa bes ýchaske boıynsha 3 jalpy tájirıbelik dáriger qyzmet kórsetedi. Iаǵnı eki dáriger jetispeıtin kórinedi.
– Turǵyndar renishi oryndy. О́ıtkeni úlken-kishini, júkti áıelderdi, qyzýy men qan qysymy kóterilgen naýqastardy da dárigerler osy zalda qabyldaıdy. Erteden keshke deıin abyr-sabyr bolamyz. Arasynda balalar jylaıdy. Kisi aıaǵy sál saıabyrsyǵan sátti paıdalanyp, eki kvarsty qosamyz. Dárilerdi saqtaıtyn oryn da talapqa saı bolmaǵandyqtan az-azdan amaldap, tasymaldaýǵa májbúrmiz. Desek te óz ornymyzǵa kóshetin ýaqyt taıap qalǵan sııaqty. Sondyqtan turǵyndarǵa shydamdylyq tanytýdan basqa amal joq, – dedi aǵa meıirbıke Aıgúl Dáýrenbekova.
Taldybulaq aýyldyq ambýlatorııasynda jedel járdem kóligi joq. Shaqyrtýlarǵa dárigerler «Nıva» avtokóligimen barady. Analız, dári-dármek te sonymen tasymaldanady. Al naýqastyń jaǵdaıy aýyr bolsa, oǵan aýdandyq aýrýhanadan jedel járdem men dárigerler kelip, qyzmet kórsetedi. Toıhanadaǵy ambýlatorııada oryn tapshylyǵyna baılanysty ázirge 3 tósekte kúndizgi stasıonardaǵy naýqastar em-domyn alýda. Negizinde 5 tósek bekitilgen.
Taldybulaq aýylyndaǵy dárigerlik ambýlatorııanyń jaǵdaıyn bilmekke «Talǵar aýdandyq ortalyq aýrýhanasynyń» dırektory Hasen Dásibekovke barǵan edik.
– Aýdan boıynsha 220 myń halyqqa medısınalyq qyzmet kórsetilip jatyr. 2021 jyly 31 medısınalyq nysanǵa kúrdeli jóndeý jumystary jasaldy. Qazirgi kúni jóndeý jumysyn qajet etetin 3 nysan bar. Bul – Nura aýyldyq aýrýhanasy, Belbulaq jáne Taldybulaq dárigerlik ambýlatorııalary. Taldybulaqtaǵy nysanǵa qurylys jumystarynyń 70-80 paıyzy jasalyp, bitken. Merdiger kompanııanyń qurylys jumystaryn belgilengen merzimde aıaqtamaýy ári qurylys barysynda jiberilgen kemshilikterge baılanysty sot júrip jatyr. Is aıaqtalǵan soń, Nura men Taldybulaqtaǵy nysandardyń jumysy tolyǵymen aıaqtalady. Sottyń qashan aıaqtalatynyn men de bilmeımin. Al Belbulaq dárigerlik ambýlatorııasy kúrdeli jóndeý jasaýǵa kele me, joq pa, ol memlekettik saraptamadan soń belgili bolady, degen aýdannyń bas dárigeri Hasen Ájibekuly atalǵan úsh nysannyń da 2012-2013 jyldary berilgenin aıtty.
On jyl buryn ǵana paıdalanýǵa berilgen bul nysandardyń búgingi sapasy joǵaryda aıtqanymyzdaı syn kótermeıtin kúıde. Sonyń biri – Belbulaqtaǵy qulaýǵa shaq turǵan medısınalyq mekeme. Seısmoqaýipti nysanǵa kirýge turǵyndar narazylyq bildirgen soń, ony jaýyp, mamandar janyndaǵy eski ambýlatorııada jumys istep jatyr. Ortalyqtan shalǵaıdaǵy Nura aýyldyq aýrýhanasynyń da 70 paıyzy jasalyp, tolyqqandy aıaqtalýyn kútýde. Bas dárigerdiń aıtýynsha, bul nysandardyń kúrdeli jóndeý jumystary aıaqtalysymen óz qyzmetin jalǵastyrady.
Osy oraıda aıta keterlik jaıt, 2020 jyly Talǵar aýdandyq ortalyq aýrýhanasy «A-Slass-Medical» jaýapkershiligi shekteýli seriktestigine senimgerlik basqarýǵa ótken.
Almaty oblysy
