«Ulttyq damýdyń ıgiligi úshin jer qoınaýyn ıgerý» aıasynda uıymdastyrylǵan forýmnyń jumysyna Indýstrııa jáne ınfraqurylymdyq damý vıse-mınıstri Iran Sharhan, Syrtqy ister mınıstriniń orynbasary Almas Aıdarov, Indýstrııa jáne ınfraqurylymdyq damý mınıstrligi Geologııa komıtetiniń tóraǵasy Eran Aqbarov, sondaı-aq álemniń 30 elinen kelgen 500-den astam ınvestor, sarapshylar men paıdaly qazbanyń óndirisimen aınalysatyn kompanııa ókilderi qatysty.
Onyń barysynda qatysýshylar Qazaqstandaǵy jáne Ortalyq Azııadaǵy taý-ken, sondaı-aq geologııa salasyndaǵy jetistikter men ózekti máselelerdi ári jer qoınaýyn ıgerý baǵytynda qajetti tehnologııalardy engizýdiń joldaryn talqylady.
«Paıdaly qazbalardyń qory jaǵynan elimiz úzdik memleketterdiń qatarynda keledi. 2017 jyly júrgizilgen quqyqtyq reforma arqyly geologııalyq barlaýǵa jeke ınvestısııalardy tartýǵa jol ashyldy. Qabyldanǵan sharalardyń nátıjesinde 700-den astam otandyq ıýnıor kompanııa qurylyp, sondaı-aq respýblıkaǵa álemdik naryqtyń iri oıynshylary tartyldy. Qazir belgilengen ýchaskelerde zertteý jumystaryn nyǵaıtyp, geologııalyq málimet alýdyń perspektıvalaryn aıqyndaý úshin memlekettik bıýdjettiń esebinen jer qoınaýyna memlekettik geologııalyq zertteý júrgizilip jatyr», dedi I.Sharhan.
Bul rette 26 mamyrda Indýstrııa jáne ınfraqurylymdyq damý mınıstrligi ıgerilmeı jatqan ken oryndaryna ınvestısııa tartý maqsatynda qatty paıdaly qazbalar boıynsha alǵashqy elektrondy aýksıon ótkizýdi kózdep otyrǵanyn eske sala keteıik. Onda jer qoınaýyn paıdalanýǵa quqyq beretin 25 ken orny saýdaǵa qoıylady.
Geologııa komıtetiniń tóraǵasy Erlan Aqbarov 2027 jylǵa deıin belgilengen otandyq geologııa salasyn damytý tujyrymdamasynyń iske asyrylýy jóninde qysqasha aıtyp berdi.
«Elimizde geologııalyq zertteý men barlaý jumystaryn kúsheıtý úshin júıeli sharalardy qabyldaýǵa týra keldi. Osy baǵyttaǵy ózekti máselelerdi sheshýdiń tetikteri Geologııa salasyn damytýdyń 2027 jylǵa deıingi tujyrymdamasynda aıqyndalǵan. Mańyzdy qujattyń negizgi maqsaty – paıdaly qazbalardy barlaý isine ınvestısııa tartý úshin qolaıly jaǵdaı jasaý», degen komıtettiń basshysy geologııa salasyndaǵy ınvestısııalyq jobalardy talqylap, tanystyrýǵa daıyn ekenin jetkizdi.
Uıymdastyrýshylardyń aıtýynsha, bul forýmnyń salalyq sarapshylar, retteýshi organdar men jer qoınaýyn paıdalanýshylar jáne ınvestorlardyń ózara tájirıbe almasýlaryna septigi mol. Bul oraıda elimizdiń taý-ken sektory ulttyq ekonomıkanyń júıe quraýshy salasy sanalatynyn aıta ketken oryndy. Qazir ónerkásiptiń osy segmentinde 273 myńnan astam adam jumys istep júr.
