Marat Ahmetjanovtyń atap ótkendeı, bıyldyń ózinde ınternette 7800-den astam alaıaqtyq jasalǵan.
«Azamattar onlaın qyzmetter men bank qyzmetterin belsendi paıdalanady. Qaýipsizdik sharalary men halyqtyń sıfrlyq saýattylyǵy sıfrlandyrý qarqynyna sáıkes kelmeıdi. Qazirgi kıberqylmystyń shekarasy joq. Alaıaqtar shetelden qońyraý shalyp, jalǵan abonenttik nómirlerdi paıdalanady, sondyqtan baılanys operatorlaryna tehnıkalyq tosqaýyl qoıady. Jalǵan nómirlerden túsken 17 mıllıon qońyraý buǵattaldy», dedi Marat Ahmetjanov Astana aktıvimen kezdesýi barysynda.
Vedomstvo basshysy elordada Kıberpoldyń qurylǵanyn eske saldy (Ishki ister mınıstrligi sıfrlyq tehnologııalar salasyndaǵy qylmyspen kúresý úshin qolǵa alǵan pılottyq joba).
«Biz ony zamanaýı qural-jabdyqtarmen jabdyqtap, ınternettegi qylmystardy ashý men tergeý tásilderin ózgerttik. Osyndaı faktiler boıynsha azamattardyń ótinishteri «bir tereze» qaǵıdaty boıynsha qabyldanady. Nátıjeler bar. Nebári 5 aıda Esil aýdanynda osyndaı 864 qylmys tirkelgen. Onyń 308-i ashyldy. Sondaı-aq Astana men Qostanaıda joq kólikterdi utyp alý úshin call-ortalyǵyn uıymdastyrǵan qylmystyq toptyń 18 múshesi ustaldy. Olar 80 azamatty aldap ketken. Keltirilgen shyǵyn 90 mıllıon teńgeni qurady. Sondaı-aq elordada ınternet-saýdany syltaý etip, 26 azamatty aldap ketken alaıaq ustaldy. Keltirilgen shyǵyn 4 mıllıon teńgeden asty. Uıymdastyrýshylardyń kóbi shetelde qalady. Sondyqtan biz sheteldik áriptestermen tyǵyz aralasamyz», dep naqtylady IIM basshysy.
Onyń aıtýynsha, munymen qatar kıberqylmystyń jańa túrlerin anyqtaý úshin biryńǵaı úılestirý qurylymyn daıyndaý josparlanyp jatyr.
