О́zderińiz biletindeı, zańsyz alynǵan aktıvterdi qaıtarý úderisi ótken jyly bastalǵan edi. Byltyr zańsyz ıemdenilgen jáne el aýmaǵynan shyǵarylǵan 600 mıllıard teńgeden astam aktıv memleketke qaıtaryldy.
Jańa zań bul jumystyń tıimdiligin arttyryp qana qoımaı, qoǵam aldyndaǵy ashyqtyqty qamtamasyz etýge mol múmkindik beredi. Osy oraıda, aktıvterdi qaıtarý jónindegi arnaıy komıssııa qurylyp, onyń quramyna ýákiletti organdardyń ókilderi, qoǵam belsendileri, halyq qalaýlylary kiretinin de aıta ketkim keledi.
Buǵan qosa, jańa qujatta aktıvterdi erikti túrde nemese májbúrlep qaıtarýdyń zańnamalyq quraldary aıqyndaldy. Bul – birqatar memlekettik qurylymdy tartýdy talap etetin aýqymdy jumys.
Zań jobasyn ázirleý kezinde Májilis depýtattary álemniń ozyq tájirıbesine súıendi. Aktıvterdiń qomaqty bóligi ózge memleketterde bolýy múmkin ekenin eskere otyryp, sheteldik organdarmen yntymaqtastyq tetikteri qarastyryldy. Bul qadam aktıvterdi elge qaıtarý kezinde ózara tıimdi ári jedel is-qımyl júrgizýge múmkindik beredi. Zań eń aldymen iri sybaılas jemqorlyq sýbektilerine jáne olıgopolııalyq toptarǵa qoldanylatynyn erekshe atap ótkim keledi.
Byltyr Memleket basshysy aktıvterdi elge qaıtarý jumysy ádildik ornatýǵa yqpal etetinin atap ótken edi. Bul quqyqtyq akti zańsyz baıýdyń sebebi men mán-jaıyn joıýdyń berik negizi bolady. Memleketke qaıtarylǵan aktıvter áleýmettik jáne ekonomıkalyq jobalardy qarjylandyratyn arnaıy qorǵa quıylady.
Halyqtyń aýzynan jyryp, memlekettiń qorjynyna qol suqqan adamdardyń aıla-sharǵysy máńgi jalǵasa bermeıdi. «Urlyq túbi – qorlyq». Jalǵyz aqıqat – osy. Qaıtarylǵan qazyna eń aldymen el ıgiligine jumsalady. Adal ómir súre bileıik. Ádiletti Qazaqstandy qurý isine birigip atsalysaıyq.
Elnur BEISENBAEV,
Májilis depýtaty
