Memleket basshysy kámeletke tolmaǵandarǵa jasalǵan zorlyq-zombylyqtyń kez kelgen túrine qatysty jazany kúsheıtýdi talap etip otyr. Jol, ǵımarat, kıim-keshek, azyq-túlik, ıaǵnı barlyǵy balalar úshin qaýipsiz bolýy kerektigin, sondaı-aq óskeleń urpaqtyń psıhıkalyq saýlyǵy – óte mańyzdy másele ekenin atap ótti. Bilim berý mekemelerindegi psıhologııalyq qoldaý qyzmetin ınstıtýsıonaldy túrde kúsheıtý qajettigin, ol úshin biryńǵaı senim telefonyn uıymdastyryp, zorlyq-zombylyqqa jáne qysymǵa, ıaǵnı býllıngke tap bolǵandarǵa kómek kórsetýge arnalǵan baǵdarlama ázirlegen durys degen bastama kóterdi.
Endi osy bastamalarǵa aımaqtardaǵy ákimderdiń, salalar boıynsha mınıstrlikterdiń jaýapkershiligin qatańdatý kerek. Árbir laýazymdy tulǵa ózine qarasty aýmaqtaǵy nemese saladaǵy zań buzýshylyqtarǵa, qylmystarǵa, sybaılas jemqorlyqqa qarsy kúreste jaýapkershiligin tolyq sezinse, adam quqyǵyn taptaıtyn áreketterge jol berilmes edi. Buǵan deıin «orynbasary jemqorlyq jasasa, basshy ornyn bosatýy kerek» dep aıtyldy. Alaıda ol oryndalyp júrgen joq, basshylar oryndarynda otyra beredi. Men sol talapty kúsheıtý kerek dep esepteımin. О́ıtkeni bul ádilettilikke tolyq sáıkes keledi.
Joldaýda Prezıdent zańsyz ıemdenilgen aktıvterdi qaıtarý týraly taǵy da aıtty. Bul baǵytta qazir zań qabyldandy, jumys bastaldy. Halyq ádilettilikti kútip otyr. Zańsyz jekemenshikke ótip ketken jáne shetelge shyǵarylǵan aktıvter memleket menshigine qaıtarylyp, odan túsken qarjy eldiń ál-aýqatyn kóterýge jumsalyp, memleket múddesine jumys isteýi kerek. Bul – Prezıdentimizdiń tikeleı baqylaýyndaǵy sharýa. El kútkendeı nátıje bolaryna senimmen qaraımyz.
Marat BÁShIMOV,
Májilis depýtaty
