«Qazaqstan» teleradıokorporasııasy kúzgi maýsymyn ulttyq jobalarǵa arnady. Osy baǵytta «Altyn qaqpa» vıktorınalyq telesaıysy, dástúrli ánshi, kúıshi, jyrshy-termeshilerdiń qatysýymen ótetin «Injý-Marjan» jobasy, «Mergender mekeni» televızııalyq sadaqshylar saıysy, qazaq jyrlarynyń tarıhyn beınelep kórsetetin «Jyr-amanat», ulttyq taǵam túrlerine arnalǵan «Dala dámi», Alash taqyrybyndaǵy teledárister toptamasynan turatyn «Ashyq akademııa» jobalary efırge shyǵady.
– Ulttyq arna sońǵy jyldary ulttyq boıaýyn saqtaı otyryp, qoǵamdyq-saıası telearna retinde qalyptasty. Sapa, jańa zamanaýı trendterdi engizý boıynsha bizdiń ujym naryqta kóshbasshyǵa aınaldy. Osynyń arqasynda aýdıtorııamyz qataryna jastar kóptep qosyldy. Sońǵy derekter boıynsha, arnanyń jastar aýdıtorııasy 32 paıyzdy quraıdy. Endi bul sanattaǵy kórermenge salt-dástúrlerimiz, án-kúıimiz, dástúrli dastarqanymyz, jalpy aıtqanda, ulttyq qundylyqtarymyzdy jańa televızııalyq sapada, jańasha formatta usynamyz, – dedi basqarma tóraıymy Lázzat Tanysbaı is-sharanyń ashylý saltanatynda.
«Injý-Marjan» baǵdarlamasynda elimizdiń ár óńirinen jınalǵan 180 ónerpazdyń oryndaýynda 300-den asa shyǵarma jazylyp alyndy. «Jyr-amanat» jobasynda halyq aýyz ádebıetiniń baı murasy «Er Qarmys», «Alpamys batyr», «Jantaı batyr» jáne «Batyr Baıan» epostary kórermenge kınoformatta jol tartady. «Mergender mekeni» ulttyq realıtı jobasynda elimizdiń barlyq aımaǵynan 2 myńnan astam kásibı jáne áýesqoı sadaqshy baq synap, jeńimpaz demeýshiler esebinen Astana qalasynan páter ıelendi. «Dala dámi» kórermendi umyt bolyp bara jatqan dástúrli dám túrlerimen tanystyrady.
Budan bólek, «Qazaqstan» teleradıokorporasııasy bıyl 11 telehıkaıa, túrli taqyryptyq baǵytta 137 derekti fılm, 20 anımasııalyq joba túsirdi. Telehıkaıalar ishinde Qazaq televızııasynyń 65 jyldyǵyna arnalǵan «Paryz», HH ǵasyrdyń 30-jyldaryndaǵy qazaq mádenıeti men rýhanııatynyń damý dáýirin sýretteıtin «Erte kóktem», túrki halyqtaryna ortaq tulǵa Qorqyt atanyń ómirine arnalǵan «Qorqyt» tarıhı serıaldary bar.
– «Qazaqstan» teleradıo korporasııasy tarıhı serıaldar óndirýdi, jalpy serıal naryǵyn damytýdy óziniń mańyzdy mıssııasy retinde jolǵa qoıdy. Tarıhı týyndylarymyz arqyly ult tulǵalarynyń ómir jolyn dáriptep kelemiz. Bıyl efırge shyǵatyn «Paryz» serıaly ulttyq arnanyń negizin qalap, 65 jyldyq tarıhynda erekshe qoltańbasyn qaldyrǵan aǵa býyn aldyndaǵy paryzymyz, – dedi L.Tanysbaı.
Al 21 qyrkúıekten bastap elimizdiń barlyq kınoteatrlarynda korporasııanyń «Mirjaqyp. Oıan, qazaq!» tolyqmetrajdy fılmi prokatqa shyǵady.
Maýsymnyń sporttyq basty jańalyǵy – 23 qyrkúıek pen 8 qazan aralyǵynda «Qazaqstan» jáne «Qazsport» telearnalary Qytaıdyń Hanchjoý qalasynda ótetin Jazǵy Azııa oıyndaryn tikeleı efırde usynady. Álemdik básekeniń el aýmaǵyndaǵy translıasııalar quqyǵy tek «Qazaqstan» teleradıokorporasııasyna tıesili. Al dıdjıtal baǵytynda bul maýsymnyń basty oqıǵasy – jaqyn kúnderi korporasııanyń «Birge» dep atalatyn onlaın kınoteatry iske qosylady.
