Shanhaı qalasynda kúz aılarynda ótetin dástúrli halyqaralyq kórmeniń maqsaty brendtik óndiristik jabdyqtardy tanystyrý. Osy joly kórmege álem elderinen kelgen 3 myńǵa jýyq kompanııa men uıymdar, onyń ishinde júzdegen ýnıversıtet qatysty.
Ál-Farabı atyndaǵy QazUÝ Ǵylym jáne ınnovasııa departamentiniń dırektory Joldas Bóribaev atap ótkendeı, CIIF halyqaralyq ónerkásip jármeńkesi iri kórmelerdiń biri retinde belgili ári Qytaıdaǵy ekonomıkalyq jáne saýda almasý men yntymaqtastyq úshin mańyzdy alań bolyp tabylady. Búgingi tańda mundaı salalyq jármeńkelerde ýnıversıtetter ózderiniń ǵylymı-tehnıkalyq ınnovasııalyq jobalaryn kórsetip, tájirıbe almasatyn eń yqpaldy alańdardyń birine aınalǵan.
Is-shara barysynda ál-Farabı atyndaǵy QazUÝ Shanhaı ýnıversıtetiniń Hi-Tech Park tehnoparkimen yntymaqtastyq týraly memorandýmǵa qol qoıdy. Qol qoıylǵan qujat tájirıbe, bilim, aqparat jáne resýrstarmen almasýdy, quzyrettilikti damytýdy, jańa tehnologııalyq sheshimderdi ázirlep, ony kommersııalandyrý maqsatynda birlesken jobalar jasaýdy kózdeıdi.
