Kerbez Kókshe topyraǵynda dúnıege kelip, óner órisiniń qazaq dalasynda órken jaıýyna ólsheýsiz úles qosqan tuǵyry bıik, rýhy órshil Arqa óńiriniń aqıyq dúldúlderi – Aqan seri Qoramsauly men Imanjúsip Qutpanulynyń shyǵarmalaryn halyqqa keńinen nasıhattaý maqsatynda uıymdastyrylǵan baıqaýǵa elimizdiń ár óńirinen 12 ánshi qatysyp, baq synady.
Baıqaýǵa Birjan sal atyndaǵy mýzyka kolledjiniń dırektory, «Mádenıet salasynyń úzdigi» Saıan Muhamedııar (qazylar alqasynyń tóraǵasy), Qazaqstannyń eńbek sińirgen ártisi, dástúrli ánshi Bısara Mákenqyzy, Qazaqstannyń eńbek sińirgen qaıratkeri, О́ner ýnıversıtetiniń dosenti, dástúrli ánshi Tolǵanbaı Sembaev, Málik Ǵabdýllın mýzeıiniń dırektory, «Mádenıet salasynyń úzdigi», dástúrli ánshi Kenjebaı Muqyshev, Aqmola oblystyq halyq shyǵarmashylyǵy jáne mádenı demalys ortalyǵy dırektorynyń mindetin atqarýshy Ashat Maǵaýın qazylyq etti.
О́nerli dodanyń qorytyndysy boıynsha III dárejeli dıplom jáne 300 myń teńge aqshalaı syılyqpen aqmolalyq ánshi Dıana Altaıqyzy, qyzylordalyq Nurtilek Aqtaev marapattaldy. II oryn men 500 myń teńge aqshalaı sertıfıkat kókshetaýlyq Tólegen Amanovqa buıyrdy. Al Almaty oblysynyń ókili Idirbaı Baıbaqty I dárejeli dıplomǵa jáne 800 myń teńge aqshalaı syılyqqa ıe boldy.
«Arqanyń án darııasy» respýblıkalyq dástúrli ánshiler baıqaýynda úzdik óner kórsetip, oryndaýshylyq sheberligin tanytqany úshin bas júlde – 1 mln teńgeniń aqshalaı sertıfıkatyna jáne uıymdastyrý alqasynyń dıplomyna Abaı oblysynan kelgen ánshi Tańat Muqyshev laıyq dep tanyldy.
Sonymen birge birqatar ánshige uıymdastyrý alqasynyń dıplomy men 100 myń teńge aqshalaı syılyq berildi.
