Jańa aýrýhananyń bar jumysy kelesi jyly tolyq aıaqtalmaq. Mine, sol kezde basy aýyryp, baltyry syzdaǵan aýdan turǵyndary at arytyp alysqa barmaı-aq, em-dom qabyldaı alady.
– Aýdandaǵy eldi mekenderdiń feldsherlik-akýsherlik pýnkteriniń jumysyn búginginiń talabyna saı úılestirý kózdelip otyr. Máselen, Ańdyqoja batyr aýylynda feldsherlik-akýsherlik pýnkt salynady. Jergilikti kásipkerler de bul máselege jetkilikti kóńil bólip jatyr. Taıaýda eki zamanaýı jedel járdem kóligin satyp áperdi, – deıdi aýdan ákimi Dostanbek Esjanov.
Salanyń serpindi jumys isteýine medısına kadrlarynyń jetispeýshiligi áserin tıgizip kelgen edi. Aldaǵy ýaqytta kadr máselesi birtindep sheshilmek. Aýdan ákiminiń granty boıynsha elimizdiń medısınalyq joǵary oqý oryndarynda 9 stýdent oqyp, bilim alyp jatyr. Demek taıaý jyldary bul másele túbegeıli sheshimin tappaq.
Aýdannyń áleýmettik-turmystyq jaǵdaıy da kóp-kórim jaqsaryp keledi. Aýdan ákiminiń aıtýyna qaraǵanda, osy jyly 2 800 sharshy metr turǵyn úı paıdalanýǵa berilgen. Bul oraıdaǵy jospar asyra oryndalǵan. Qazirgi kúni Stepnıak qalasynda 21 páterli turǵyn úıdiń qurylysy júrgizilip jatyr. Aýdandaǵy kóppáterli úılerdi jóndeý 14 joba boıynsha júzege asyrylyp jatyr. Halyqty sapaly sýmen qamtamasyz etýde de atap aıtarlyqtaı ózgeris bar. Máselen, Baımyrza aýylynyń turǵyndaryn aýyz sýmen jabdyqtaý jelilerine jóndeý jumystary júrgizildi. Sondaı-aq Zaozernoe eldi mekenindegi sý qubyrlaryn jańǵyrtý josparlanyp otyr. 7 eldi mekende sý berý qurylǵylary ornatylǵan. Jyl sońyna deıin 40 shaqyrymdyq jol jóndelmek.
– Qazir Shýchınsk – Stepnıak baǵytyndaǵy tasjoldyń jóndeý jumystary júrgizilip jatyr. Baımyrza aýylynda – 8, Keńashy aýylynda 5 shaqyrymdyq jol salynýda, – deıdi aýdan ákimi.
Abattandyrý jumysy da muqııat qolǵa alynǵan. Stepnıaktaǵy Birjan sal men Chapaev kósheleriniń boıy abattandyrylyp, tazartyldy. Aýdan ortalyǵyndaǵy ilkimdi is aýyldarda da kórinis tapqan. Ańǵal batyr men Baımyrza aýyldarynda sport alańdary salynyp, Keńashy aýylynda fýtbol alańy paıdalanýǵa berildi. Aýyl turǵyndarynyń salamatty ómir saltyn saqtaýyna meılinshe qolaıly jaǵdaı týǵyzylyp otyr. Atap aıtatyn bolsaq, Zaýralovka jáne Qudyqaǵash aýyldarynda zamanaýı sport alańdary salynyp jatyr. Kelesi jyly Tasshalqar, Birsýat, Sáýle, Qoǵam, Maqpal aýyldarynda osyndaı alańdar salynady. Bir sózben aıtqanda, Birjan sal aýdanynyń berekesi kirip-aq keledi.
Aqmola oblysy,
Birjan sal aýdany
