– Memleket kepildik bergen zań kómegi – ony alýǵa quqyǵy bar jeke jáne zańdy tulǵalarǵa kórsetiletin zań kómegi. Qazaqstannyń árbir azamaty azamattyq, ákimshilik jáne qylmystyq úderister sheńberinde bilikti zań kómegin alýǵa ajyramas quqyqqa ıe. Memleket azamattarǵa ádildik pen zań aldyndaǵy teńdik qaǵıdattary negizinde bul qoldaýǵa kepildik beredi, – dep atap ótti Almaty qalasy Ádilet departamenti basshysynyń orynbasary Qaırat Bazarbaev.
Zań keńesi aıasynda alıment óndirip alý, zeınetaqy men járdemaqy taǵaıyndaý, ońaltý, bosqyn nemese qandas mártebesin alý máseleleri boıynsha jeke tulǵalardyń, ata-anasynyń qamqorlyǵynsyz qalǵan kámeletke tolmaǵandardyń ótinishteri qabyldanady. Sonymen birge jynystyq zorlyq-zombylyq, adam saýdasy, terrorızm aktisi qurbandary ne osy mártebege nemese jaǵdaıǵa baılanysty olardyń quqyqtary men zańdy múddelerin qamtamasyz etý jáne qorǵaý máseleleri boıynsha azaptaýǵa ushyraǵandarǵa da zańgerler tegin keńes beredi. Jeke tulǵalarǵa asyraýshysynyń qaıtys bolýynan keltirilgen zııandy óteý máseleleri, jumys barysynda densaýlyǵyna zııan kelip jatsa jáne qylmystyq quqyq buzýshylyqtan keltirilgen zııandy óteý máseleleri de tegin zań keńesi aıasynda qarastyrylady. Ekinshi dúnıejúzilik soǵystyń qatysýshylaryna, jeńildikteri boıynsha osy soǵysqa qatysýshylaryna teńestirilgen adamdarǵa, sondaı-aq basqa memleketter aýmaǵyndaǵy jaýyngerlik is-qımyldarǵa qatysqan ardagerlerge, merzimdi qyzmettegi áskerı qyzmetshilerge, birinshi jáne ekinshi toptaǵy múgedektigi bar adamdarǵa, zeınetkerlerge kásipkerlik qyzmetpen baılanysty emes máseleler boıynsha kópbalaly otbasylardy tolǵandyrǵan máselelerge oraı quqyqtyq qoldaý kórsetiledi. Sondaı-aq kásipkerlik qyzmetpen baılanysty emes máseleler boıynsha oblystarda, respýblıkalyq mańyzy bar qalalarda, astanada belgilengen kedeılik sheginen bir aıda jan basyna shaqqandaǵy ortasha tabysy bar az qamtylǵan otbasylar da osy tegin zań keńesine júgine alady.
Sottarda, qylmystyq qýdalaý organdarynda, ózge de memlekettik organdar men memlekettik emes uıymdarda jeke tulǵalardyń múddelerin qorǵaý jáne ákimshilik jaýaptylyqqa tartylǵan azamattarǵa, talapkerler men jaýapkerlerge, Qylmystyq-prosestik zańnamaǵa sáıkes kúdiktilerge, aıyptalýshylarǵa, sottalýshylarǵa, sottalǵandarǵa jáne jábirlenýshilerge de keńes beriledi.
– Joǵaryda atalǵan barlyq azamat turǵylyqty mekeni men ornalasqan jerine qaramastan memleket kepildik bergen zań kómegin alýǵa quqyly. Memleket kepildik bergen zań kómegine muqtaj adamnyń múddesi úshin mundaı kómek kórsetý týraly ótinishpen zańdy ókili belgilengen tártippen júgine alady, – dep túsindirdi spıker.
Bul qyzmet túrlerin alý úshin Almaty qalasynyń Ádilet departamentine júginýge bolady. Zań keńesshileri qyzmetti «pro bono» túrinde kórsetedi. Qazirgi ýaqytta Almatyda memleket kepildik bergen zań kómegin alý boıynsha 15 zań keńesi jumys isteıdi. Zań keńesteriniń meken-jaılarymen Ádilet departamentiniń resmı saıtynda tanysýǵa nemese 119 nemese 14 – quqyqtyq aqparattyq qyzmet nómirine habarlasyp, anyqtaýǵa bolady.
ALMATY
