Kollajdy jasaǵan – Qonysbaı ShEJIMBAI, «EQ»
«Bektaý» men «Novoselovka» jaýapkershiligi shekteýli seriktestikteri uzyn-yrǵasy 26 myń metrden astam jerdi tereńdigin 1,5, enin 1 metrden asyra orlap, qazyp tastaǵan. Árıne, eginjaıdy, qunarly shabyndyqty beısaýat maldan qorǵaǵan durys. Áıtse de, or qazýdyń ońtaıly sheshim emes ekendigin bastan jaqty aıyrǵandaı etip aıtqan durys. Aıaqty mal tisine iliner qunarly shóp izdemeı tura ma, onyń ústine mal qaraýsyz qalmasyn dep tártipti nyǵaıtyp, talapty kúsheıtkenimizben, beısaýat júrgen baǵýsyz mal az emes. Jalǵyz tórt túlik mal ǵana emes, tereńdep qazylǵan or ań-qusqa da qaýip. Adamǵa eki bastan.
Tabıǵat janashyrlary seriktestik basshylarynyń teris sharýalaryn jalpaq jurtqa áıgilep, dabyl qaqqaly qashan. Jer qoryǵannyń jóni osy eken dep árkim óz ıeligindegi alqaptyń shetin orlap qaza berse, saıyn dalada sán qala ma?
«Bul áreket Ákimshilik quqyq buzýshylyq týraly kodekstiń 337-babyna jatady. Iаǵnı jerdiń qunarly qabatyn zańsyz alyp tastaý nemese joıý. Seriktestik basshylary ákimshilik jaýapkershilikke tartylyp, árqaısysyna bir myń aılyq eseptik kórsetkish kóleminde aıyppul salyndy», deıdi oblystyq jer resýrstaryn basqarý departamentiniń bas mamany Sholpan Moldaǵalıeva.
Zań boıynsha jalǵa alǵan jerdi qazýǵa ruqsat joq. Aldaǵy ýaqytta jerimdi qorǵaımyn dep orynsyz or qazýdan saqtandyrý úshin osy bir mysaldy oqyrman nazaryna usynýdy durys dep taptyq. Or qazǵandar osylaısha opyq jeıdi. Ilkidegi qazaq «Bireýge or qazba...» degendi nege aıtty deısiz.
Aqmola oblysy,
Shortandy aýdany
