Kúmis kúlkisi syńǵyrlaǵan jas óskinder men ǵumyryn bilim jolyna arnap kele jatqan ustazdar qaýymy, ata-analar qýanyshty sátke kózaıym bolyp, mekteptiń ashylý saltanatyn asqaq kóńilmen ótkerdi. Jetisýlyq zııaly qaýym, el jaqsylary men shahar turǵyndary qatysqan №30 orta mekteptiń ashylý saltanatynda oblystyq bilim basqarmasynyń basshysy Marat Súleımenov Memleket basshysy óskeleń urpaqtyń tereń bilim, tálimdi tárbıe alýyna barlyq jaǵdaı jasaýdy mindettegenin atap ótti. «Soǵan oraı elimizde, sonyń ishinde óńirimizde bilim salasyn damytýǵa barynsha qoldaý kórsetilip keledi. «Jaıly mektep» ulttyq jobasy aıasynda oblysta 7 mektep, sonyń 3-i Taldyqorǵan qalasynda salynady. Sol sııaqty ótken jyly 10 bilim nysanynyń qurylysyn aıaqtaý josparlanǵan edi. Sonyń biri – Yntymaq aýylyndaǵy búgin esigin aıqara ashyp otyrǵan 1200 oryndyq bilim ordasy», dedi M.Súleımenov.
Búginde mektepke 661 oqýshy qabyldandy, 31 synyp kesheni ashyldy. Onyń ishinde О́tenaı aýylyndaǵy №21 orta mektepten 13 synyp, 345 oqýshy kóship kelgen. Olar jetekshisimen jańa mektepke birge aýysyp, oqýshylardy tasymaldaý máselesi sheshildi. Sonymen qatar pedagogterge 30 bos oryn jáne 20 kishi qyzmetkerge konkýrs jarııalanyp, qabyldaý júrip jatyr.
Ardager ustaz Mınýar Baımoldanova da izgi tilegin arnady. Kelesi kezekte mektep qurylysyna jaýapty merdiger kompanııa «Gýnn Stroı Servıs» kompanııasynyń bas dırektory Sábıt Qalımoldaev jańa nysannyń kiltin mektep dırektory Sáýle Úsenovaǵa tabys etti. Án asqaqtap, bı bılengen is-shara barysynda mektep lentasyn oblystyń bas ustazy M.Súleımenov pen ardager ustaz M.Baımoldanova qıdy.
Jańadan ashylǵan mektep zamanaýı talapqa saı jabdyqtalǵan. Oqýshylardyń sapaly bilim alýyna barlyq múmkindik jasalǵan. Mektepte 50 oryndy oqý zalymen kitaphana, sport zal, gımnastıkalyq zal, 405 oryndyq ashana, 390 oryndyq májilis zaly, fızıka, hımııa, bıologııa jańa modıfıkasııalyq kabınetteri, 4 mýltımedııalyq kabınet, uldar men qyzdar sheberhanalary bar. Sonymen qatar pán kabınetteriniń barlyǵy qajetti ádistemelik, tehnıkalyq quralmen jabdyqtalǵan.
Jetisý oblysy
