Memleket basshysy Qasym-Jomart Toqaev: «Balalarǵa bılik tarapynan densaýlyq saqtaý, bilim berý jáne áleýmettik qamsyzdandyrý salasynda balalardy qorǵaý maqsatynda naqty is-sharalar jasalýy kerek», degen edi. Bul oı balalarmen tikeleı jumys isteıtin Oqýshylar saraıyna da úlken jaýapkershilik júktegeni belgili. Taldyqorǵandaǵy 2016 jyly irgesi qalanǵan nysan balalardyń bos ýaqytyn qamtamasyz etýde hám alǵan bilimderin praktıka júzinde iske asyrýda mańyzdy rólge ıe. Estetıkalyq, lıngvıstıkalyq, mýzykalyq, kórkemóner, ǵylymı-tehnıkalyq, sporttyq, týrızm, balalar qozǵalysy baǵytynda jumys isteıtin úıirmeler zerek oqýshylardyń jansaraıyn ashady. Oqýshylar saraıynyń dırektory Lázzat Muqametqalıqyzynyń aıtýynsha, óskeleń urpaqtyń qyzyǵýshylyǵy men shyǵarmashylyq qabiletterin
damytýda ortalyqtyń qosar úlesi orasan.
– О́z ultynyń tarıhyn, mádenıetin, tilin, ónerin biletin, ony qadirlep, qasterleıtin ultjandy azamat tárbıelep jatyrmyz. Jetkinshekterdiń óz múmkindikterin júzege asyrý qajettilikteri men ustanymyn qalyptastyrýda da jumystar júrip jatyr. Oqýshylar saraıy 44 úıirme, 8 baǵyt boıynsha jumys isteıdi. Talaı shákirtimiz halyqaralyq ári respýblıkalyq baıqaýlarda top jaryp, óńirdiń ǵana emes, eldiń abyroıyn asqaqtatyp júr, – deıdi L.Muqametqalıqyzy.
Búginde Oqýshylar saraıynda 2 230 bala oqyp jatyr. Olarǵa óz salasyn jetik meńgergen 63 pedagog sabaq beredi. Kez kelgen oqýshynyń darynyn ulttyń rýhanı ıgiligine tıimdi paıdalanýǵa bolatynyn dáleldegen atalǵan shańyraqtyń jetken jetistigi birshama. Máselen, osydan úsh jyl buryn «Solnyshko» horeografııalyq bı ansambli Parıjdegi «Magnifique Paris International festival of arts» jáne Tashkenttegi «Roze of the east» baıqaýlaryna qatysyp, jeńimpaz atanǵan. Bı ónerinen bólek, án-jyr, qolóner sheberleri halyqaralyq, respýblıkalyq baıqaýlarda joǵary nátıje kórsetip júr. Ǵylymǵa jaqyn jastardyń da óneri kópti tańǵaldyrady. Onyń árqaısysyna jeke-jeke toqtalý múmkin emes.
Shyǵarmashylyq ortalyq vokal, akterlik óner, satıra óneri, bı, dástúrli án, aspaptarda oryndaý, shahmat, balalar telejýrnalıstıkasy, foto-beınetúsirilimderdi montajdaý sekildi salalardy jetik meńgerýge jol ashady. Bul jańa úlgidegi zamanaýı saraıdyń basqa qosymsha bilim berý ortalyqtarynan bir ereksheligi osy. Balalardyń qyzyǵýshylyǵyn ýaqyt úderisine saı tehnıkalyq baǵyttarǵa burýǵa basymdyq berýimen daralanady. Sondyqtan el aýmaǵyndaǵy kásibı bilikti mamandardy arnaıy shaqyryp, olardyń taǵylymdy tájirıbesin jastarǵa úlgi-ónege retinde kórsetý qolǵa alynǵan.
Jańa tehnologııalar álemindegi balalar men jastar shyǵarmashylyǵy uǵymynyń ózgergenin túsiný ınnovasııalyq ádistemelerdi belsendi engizýdi, zamanaýı qural-jabdyqtardy keńinen qoldanýdy qajet etedi. Osy maqsatta túrlengen Jetisý tórindegi qosymsha bilim berýdiń basty ordasy sanalatyn shańyraq óńirdegi talanttardyń sheberhanasyna aınalyp otyr.
– Oqýshylar saraıy balalardyń mektepten tys bos ýaqytyn tıimdi paıdalanýǵa zor yqpal etetin birden-bir mekeme der edim. Bul jerde bala ózin túrli baǵyt boıynsha synap kóre alady. Atalǵan mekemege aıaq basqaly tynymsyz eńbek pen izdenistiń nátıjesinde meniń de jetken jetistigim az emes. Birneshe respýblıkalyq, halyqaralyq baıqaýdan «Kórkemsóz» janry boıynsha júldeli oryndarǵa ıe bolyp, shet memleketterge joldama aldym, – deıdi «Jas qalamger» úıirmesiniń qatysýshysy Aqbota Qabden.
Ult ustazy Ahmet Baıtursynulynyń «Biz áýeli eldi túzetýdi bala oqytý isin túzetýden bastaýymyz kerek» degen sózi bar. Balalardy bilim jolyna salyp, túzý joldan taıdyrmaı, sanaǵa sáýle shashar oqý-bilimniń tizginin ustatý memleket pen qoǵamnyń mindeti sanalady. Qandaı myqty memleket bolsyn, jastardyń bilimi men oqý-aǵartý isine kóp kóńil bóledi. Keleshektiń irgetasyn qalaý úshin, eń aldymen, sol eldiń kishkentaı azamattarynyń sanaly urpaq bolyp jetilýine kúsh salý kerek. Elimizdiń bolashaǵy balalardyń jan-jaqty, daryndy, bilimdi, ónerli bolyp ósip-jetilýine jaǵdaı jasap otyrǵan Oqýshylar saraıynyń jetistigi munymen toqtamaı, bolashaqtyń kóshin bastar azamattar túlep ushatynyna senim mol.
Jetisý oblysy
