Kásiporynnyń bas dırektory Kım De Kı zaýytta 1,5 myń jańa jumys orny ashylatynyn atap ótti. Bastapqy kezeńde «Sorento», «Sportage» jáne «Cerato» sııaqty shaǵyn torapty 3 model óndirisin jolǵa qoıý kózdelip otyr. Zaýyt 2025 jyly iske qosylady.
Álıhan Smaıylov búginde Úkimet ekonomıkany ártaraptandyrýǵa jáne óńdeý ónerkásibinde lokalızasııalaýdy tereńdetýge úlken kóńil bólip otyrǵanyn atap ótti.
«Biz Qazaqstanda osyndaı iri ınvestısııalyq jobanyń iske asyrylýyn quptaımyz. Meniń bilýimshe, bul – Eýrazııa qurlyǵyndaǵy jalǵyz zaýyt. Bireýi AQSh-ta, ekinshisi osynda. Atalǵan zaýyttyń qýattylyǵyn eskersek, bul – bizdiń respýblıka úshin óte mańyzdy joba», dedi Premer-mınıstr.
Úkimet basshysy atap ótkendeı, búginde otandyq mashına jasaý salasy, onyń ishinde avtomobıl ónerkásibi qarqyndy damyp keledi. О́tken jyldyń qorytyndysy boıynsha, elimizde 148 myń avtokólik shyǵaryldy, bul kórsetkish aldyńǵy jylmen salystyrǵanda 30%-ǵa artyq.
«Biz ishki naryqty ártúrli avtokólik túrlerimen tolyqtyrý maqsatynda ǵana emes, sonymen qatar eksportqa shyǵarý úshin de osy serpindi saqtaýdy jalǵastyrýymyz kerek. Bul – bizdiń odan ári turaqty damýymyz turǵysynan óte mańyzdy», dedi Álıhan Smaıylov.
Sondaı-aq Premer-mınıstr jańa «Kia» zaýytynda shaǵyn torapty qurastyrý ádisimen 50 myńǵa jýyq avtokólik shyǵarylatynyn aıtty.
«Bul – otandyq avtomobıl óndirisin damytýdaǵy óte mańyzdy kezeń. Biz atalǵan jobanyń jedel júzege asýyn tolyq qoldaımyz», dedi Úkimet basshysy.
Premer-mınıstr «Allur» zaýytyna baryp, «Chevrolet Onix» avtokóliginiń óndiristik josparymen tanysty. «Allur» kompanııalar toby dırektorlar keńesiniń tóraǵasy Andreı Lavrentevtiń aıtýynsha, zaýyt tolyǵymen ishki naryqqa baǵdarlanǵan jáne qoljetimdi baǵamen avtokólikter shyǵarady. Serııalyq óndiris kólemi jylyna 30 myń kólikke jetkende, konveıerde 400-den astam jańa jumys orny ashylady.
Álıhan Smaıylov óńdeý ónerkásibiniń ekonomıkadaǵy úlesi qazirdiń ózinde shıkizat óndirý salasymen teńesip otyrǵanyn atap ótti. Úkimet qosylǵan quny joǵary salalardyń paıdasyna shıkizat baǵytynan birte-birte sheginý úshin óńdeý ónerkásibiniń damý qarqynyn jedeldetý jumystaryn jalǵastyrady.
«Jańa óndiris oryndaryn iske qosý avtomobıl ónerkásibindegi óndiris kólemin aıtarlyqtaı arttyrýǵa múmkindik beredi. Ol qazirdiń ózinde ekonomıkamyzdyń strategııalyq mańyzdy salasyna aınalyp otyr. Biz onyń qarqyndy damýyna jáne el ekonomıkasynyń ornyqty bolýyna odan ári yqpal etetin bolamyz», dedi Premer-mınıstr.
Úkimet basshysy óńirde aýyl sharýashylyǵy tehnıkalaryn qurastyratyn, komponentter men qosalqy bólshekter shyǵaratyn «AgromashHoldıng KZ» lokalızasııa ortalyǵynda boldy. Búginde kásiporyn jylyna 1 myń kombaın, 3 myń traktor, 300-ge jýyq tuqym sepkish jáne 200 jınaýshy platforma shyǵara alady. Atap aıtqanda, ótken jyly el kóleminde dıqandardyń egis alqabyna 1 200-den astam traktor men kombaın jetkizildi.
Álıhan Smaıylov qazirgi tańda aýyl sharýashylyǵy mashınalaryn jasaý salasy joǵary ósý qarqynyn kórsetip otyrǵanyn atap ótti. Máselen, ótken jyl qorytyndysy boıynsha 6,4 myń astyq jınaıtyn kombaın men traktor shyǵarylǵan. Bul – 2022 jylmen salystyrǵanda 20%-ǵa artyq.
«Biz osy qarqyndy saqtap, óndiristi arttyrýymyz qajet. Osy turǵydan alǵanda, jergilikti qamtýdyń úlesin arttyrý, jumys oryndaryn ashý jáne aımaqtaǵy shaǵyn jáne orta kásiporyndardy jumyspen qamtý maqsatynda mundaı lokalızasııalaý ortalyǵy jumysynyń mańyzy zor. Biz ákimdikpen birlese otyryp, mundaı kásiporyndarǵa jan-jaqty qoldaý kórsetetin bolamyz», dedi Premer-mınıstr.
Qostanaı oblysyndaǵy ónerkásip kásiporyndarynyń ósý qarqynyn eskersek, el aýmaǵy boıynsha júk tasymaldaryn ulǵaıtý qajettiligi artyp keledi. Álıhan Smaıylov zamanaýı temirjol termınalyn salý jobasymen tanysty. Qurǵaq port Qostanaı oblysy arqyly ótetin konteınerlik tasymaldaý kólemin 5 esege arttyrýǵa múmkindik beredi.
Sondaı-aq Premer-mınıstr jylyna 170 myń tonna daıyn ónim shyǵaratyn «Kaıdzen» dándi-burshaqty daqyldar óńdeıtin jańa kásiporynda boldy. Munda shıkizattan bastap qaptamaǵa deıin tolyq óndiristik sıkl jolǵa qoıylǵan. Jobaǵa 4 mlrd teńge kóleminde ınvestısııa tartylyp, 70 jumys orny ashyldy.
Álıhan Smaıylov Úkimettiń aldynda agroónerkásiptik keshende shyǵarylatyn ónim kólemin eki esege arttyrý boıynsha úlken mindet turǵanyn atap ótti.
«Jýyrda ǵana biz osy taqyryp boıynsha úlken jıyn ótkizdik, onda árbir óńirdiń bıylǵy jáne kelesi jyldarǵa arnalǵan naqty kórsetkishterin belgiledik. Bul – egis alqaptaryn ulǵaıtýǵa, sý únemdeý tehnologııalaryn iske qosý, mıneraldy tyńaıtqyshtardy engizý, qaıta óńdeýdi damytý jáne basqa da salalarǵa qatysty. Atalǵan mindetterdi ýaqtyly ári tolyq kólemde júzege asyrý mańyzdy», dedi Úkimet basshysy.
Qostanaı oblysy
